Kanukoka: Siunnersuut tunuartinneqarli
Kommunini aqutsinermi inatsimmi aalajangersagaq maanna atuuttoq ataannassasoq, Kanukoka-p kissaatigaa, taamaalilluni borgmesterit taakkualu tullersortaasa qinigaaffik naallugu atuuffeqartarnerat ingerlaannaqqullugu. Taamaaliornikkut kommunini politikkikkut sulinerup patajaatsuunissaa qulakkeerneqassasoq, Kanukoka isumaqarpoq.
Borgmesterip parteeqataataluunniit partiimut allamut nuunnermigut ikinnerussuteqalersoq tunuartinneqarsinnaalissappat, sumiiffinni nukillaarsaataasumik politikikkut aalaqqajuttunngortitsissaaq, KANUKOKA-p siulittaasua , Enok Sandgreen allappoq.
Kommunini politikkikkut sulinerup patajaatsuunissaa qinigaaffimmi siullermi, kommunit nutaat aallarnisarfianni, pisariaqartoq Kanukoka-mit erseqqissarneqarpoq.
Taamaammat Kanukoka-p eqqumiigaa, kommunit allangornissaannut qaammataaluinnanngortullu Inatsisartut ataatsimiititaliaanit allannguutissatut siunnersuut qaqinneqarsimammat.
Taamaammallu Kanukoka-p siunnersuutip aappassaaneerneqarnissaa inatsisartut kinguartissimammassuk, kommuninut tusarniaaqqinnissamut taamaalilluni piffissaqarlualissammat.
Kommunini aqutsinermi inatsisip allanngortinnissaanik siunnersuut tamaat Naalakkersuisut tunuartissimavaat, Inatsisartullu aappaagu ataatsimiinnissaanni aatsaat siunnersuusiussallutik naatsorsuutigalugu.
