KANUKOKA siulittaasortaartoq
2004 –imi Kommunitsialanngortumik ukioq-manna toqqaasoqanngilaq.
Siunnersuutit ikippallaarnerat pissutigalugu KANUKOKA-p ataatsimeersuarnerani kommunitsialanngortussamik toqqaanissaraluaq taamaatiinnartariaqarsimavoq.
Politikerit taamaalillutik kommunitsialammik toqqaanissartik aappaagumut utaqqisiinnartariaqarpaat.
Ataatsimeersuarnermi oqaluuserisassat sinneri ataatsimeersuarnerup ingerlanerani ulluni kingullerni marlunni tamarmik oqaluuserineqarput.
Ataatsimeersuartut siulittaasussamik qinersipput, qinigaavorlu Siumumeersoq, Lars Karl Jensen, Qeqertarsuaq. Aaqqissuusseqqinnermi ataatsimiititaliap suliaa innarluutilinnullu tunngasut ataatsimeersuartunit oqaluuserineqarput.
Meeqqat sumiginnakkat pillugit oqallinneq oqallinnermi aamma malunnartinneqarpoq. Ilaqutariinnermut naalakkersuisup, Tommy Marø-p, KANUKOKA-milu siulittaasutut tunuartup, Jens Lars Fleischer-ip, meeqqanut inuusuttunullu politikkikkut suliniuteqarnissaannik kommunit kaammattorpaat. Nunatsinni kommuninit 18-iusunit tallimaannaat meeqqanut inuusuttunullu suliniuteqarput.
