KANUKOKA "sanigorsagaq" nukittooq
Nunatsinni kommunit aaqqissuunneqarnerata kingorna KANUKOKA isaasalerlugu sanigorsarneqarpoq. Siornalu ataatsimeersuarnermi aalajangerneqarpoq aningaasartuutit 20 procentimik appartinneqassasut.
KANUKOKA nunatsinni qitiusumik oqartussanit tassa Nammisorlutik Oqartussanik, kommunit ataastsimoorlutik isumaqatiginniartarnerannik aaqqissuussinermi maannamut atuuttumi sakkussatut nukittuutut inissisimanissaa kaffuffiup siulersuisuisa pingaartittorujussuuaat.
Siulersuisulli oqaatigaat, nukittussagaanni qanoq angissuseqarneq tamatigut apeqqutaasariaqanngitsoq. Apeqqutaanerullinili suliassat qanoq pingaarnersiorneqartassanersut.
Tamatumunngalu atatillugu, siulersuisut kingullermik ataatsimiikkamik aalajangerput, KANUKOKA-p suliassatigut ataasiakkaatigut kommuninut toqqaannartumik sullissinera unitsikkiartuaarneqassasoq.
Tamatumunnga taarsiullugu suliniutigineqalerpoq, sulisut politikerillu pikkorissarneqartarnerannik ineriartortitseqqinnissamut periarfissanik allattoqarfimmi maanna siunnersuusiortoqassasoq, tusagassiortunut nalunaarummi ilaatigut taama allassimasoqarpoq.
Kommunit suleqatigiiffiata aaqqissuusaanermigut allanngortinneqarnera naammassiniarneqarpoq 2012-imut missigersuutit oktobarimi aalajangersarneqarneratigut.
