Kanukoka sakkortuumik isorinnippoq
Kommunit kattussuunneqarnerannut atatillugu oqartussaaffinnik tunniussinissamut pilersaarutit kiisalu kommuninut aningaasanik sipaarniarnerup tunngavilersorneqarneri, Enok Sandgreenip saqqummiinermini uparuartorpai.
Innarluutilinnik isumaginninnermi akisussaaffik kommunit juulip aallaqqaataanni tigusussaagaluaraat, Inatsisartuni januaarip aallaqqaataanni 2011-mi pisussanngorlugu aalajangerneqarpoq.
- Suliassaqarfiup tiguneqarnissaata kinguartinneqarnera ajuusaarnarpoq pisariaqarlunili, Naalakkersuisoqarfiit suliassaqarfinnik tunniussisussat siunissami piareersaaqataanerat pitsaanerusariaqarpoq, Enok Sandgreen oqarpoq.
Siulersuisuniilli tassunga atatillugu suliassaqarfimmut aningaasatigut atugassat pillugit isumaqatigiinniutigineqartassasut iluarisimaarneqartoq, oqaatigaa.
Siulersuisut nassuiaammi aningaasaqarnerup eqqartorneqarnerani pakatsissuteqarput sakkortuumillu isorinnillutik. Naalakkersuisunit kommuninut tapiissutit 30 millionit koruuninik ikilineqarnerisa tunngavilersorneqarnera isorineqarluni.
Kommunit isertitaat piffissami ukiuni 2000-2010-mi Namminersorlutik Oqartussat isertitaannit amerliartornerusimasut, tunngavigineqarluni.
- Naatsorsuinermili toqqammavissarsiornermi akileraarutitigut isertitat inaarutaasumik naleqqussarneqartarneri aaqqiivigineqartarnerisalu kingusinnaarujussuartarneri eqqarsaatigineqarsimanngillat, Enok Sandgreen oqarpoq, kiisalu Kommunit Namminersorlutillu Oqartussat qanimut suleqatigiinnissaat pisariaqartoq erseqqissarlugu.
