KANUKOKA: Qanimut oqartussaaqataaneq nukittorsarneqartariaqarpoq
Kommunerujussuit ilaanni, ingammik isorliunerusuni arlalitsigut sanngiillisitsisoqarsimasoq, kommunit kattuffiata, KANUKOKA-p siulittaasuata, Palle Jerimiassenip tamanna maanna nassuerutigaa.
- Piffinni assigiinngitsuni isorliunerusunilu sanngiillititsisoqarsimavoq. Tamannalu aaqqiivigineqarnissaa suliassaavoq annertooq, KANUKOKA-p siulittaasua taama oqarpoq.
Aamma atuaruk Najukkani oqartussaaqataaneq unammillernarsimavoq
Kommuneqarfik Sermersuup ilaani Tunumi, kommunerujussuanngortitsinerup kingorna qanimut oqartussaaqataaneq innarlerneqarsimasoq, Siumut sinnerlugu kommunalbestyrelsimi ilaasortap Tasiilameersup, Vittus Mikaelsenip KNR-imut ataasinngormat oqaatigaa, siunnersuutigalugulu Tunu immikkut kommuninngortariaqartoq.
- Isumaqarpunga nammineq inuiaqatigiit maani Tunumi akisussaassuteqaqataallutik aallarteqqippata oqartussaaqataaneq iluarseqqissasoq. Taamaattumik Tunu kommunerujussuarminngaanniit immikkoortittariaqarpoq, Vittus Mikaelsen siunnersuuteqarpoq.
Aamma atuaruk Vittus Mikaelsen: Tunu immikkut kommuninngorli
Kommunerujussuanngortitsinerup kingorna ungasianit aqunneqarnerit annertuumik isornartorsiorneqarnerat, kommunit kattuffiata siulittaasuanit, Palle Jerimiassenimit aamma nassuerutigineqarpoq. Taanna kommunit tamaasa ataatsimut eqqarsaatigalugit ima oqarpoq.
- Taamaattumik kommuni avinneqassappat avinneqassanngippaalluunniit sumiiffinni innuttaasut oqartussaaqataaneri eqqumaffigalugit annertuumik nukittorsarneqartariaqarput.
Palle Jerimassen oqarpoq eqqaamaqqullugulu, innuttaasut oqartussaaqataanerat allaffisornikkut sullissinerinnarmiinngimmat, aningaasaqarnerinnarmiinngimmat aamma inatsisiniiginnanngimmat.
- Innuttaasut oqartussaaqaanerat sumiiffimminni oqartussaaqataaneruvoq imaalilluni, innuttaasut namminneq ilusilersueqataallutik, aaqqissuusseqataallutik sulianullu assigiinngitsunut peqataasutut misigisimanissaat pingaarutilerujussuuvoq. Tamannalu puigorneqassanngillat, kommunit katuffiata, KANUKOKA-p siulittaasua, Palle Jerimassen taama oqarpoq.
