KANUKOKA: Pisortat suliffeqarfii aaqqissuuteqqittariaqarput

Ilulissani kulturikkut illorsuarmi Sermermiuni kommunit kattuaffiani aallartitat ataatsimiinnertik nalunaaquttap akunneri pingasut matuma siornatigut aallartiinnaqaat.

Ullaakkut erinarsuut ”Sulisa unnulersinnagu” aallarniutigalugu ataatsimeersuarneq ammarneqarpoq. Aallartitat ukioq manna ataatsimiinnerminni pisortat suliffeqarfiisa aaqqissuuteqqinnissaat eqqartussavaat. Tamatumunnga atatillugu kommunit ikittuaqqat angisuullu kattuppata qanoq aaqqissuussisoqaqqissanersoq eqqartuisoqassaaq. Ataatsimiinnermi peqataasut eqimattanngorlutik ualimut taakkunannga eqqartuiniarput. Siulittaasuugallartup, Karl Lyberthip, siulittaasup nalunaarusiaani naatsuaqqamik tamanna tikippaa.

- Kommunit kattussuuppata suut tamarmik aaqqikkunnanngilat, Karl Lyberth oqarpoq nangipporlu, ukiuni tulliuttuni nukissanik amerlanerusunik atorfissaqartitsinissarput pisariaqassasoq erseqqissigaluttuinnarpoq.

Karl Lyberthip KANUKOKA-p siulittaasuanit, Lars Karl Jensenimit inuulluaqqusissut apuuppaa. Taanna qaratsaminik sakkukinnerusumik aanaartooreerluni maanna sungiusarpoq.

Aallartitat ataatsimiinneranni immikkut peqataatinneqartut ilagaat naalakkersuisut siulittaasuat Hans Enoksen. Taassuma oqaaseqarnermini aaqqissuusseqqinnissap atuutilernissaata ullulerneqarsimanera eqqaallatsiarpaa. Ukiup naannginnginneranni kommunit tamarmik kommunit sorliit suleqatigilissanerlugit naalakkersuisunut ilisimatitseriissapput. Tamatumalu kingorna inatsisartut upernaakkut ataatsimiinneranni kommunit kattussuunnissaannik siunnersuut saqqummiunneqassaaq. Kommunit nutaat maajip aallaqqaataani 2009-mi kattutsinneqassapput aallaqqaataaniillu Namminersornerullutik Oqartussanit suliassanik assigiinngitsunik tigusiortussallutik. 2013-p tungaanut suliassanik assigiinngitsunik tigooqqaasoqassaaq.

Kommunimi atorfilittat 22-t ataatsimiinnermi peqataapput. Aallartitat ataatsiminneranni inuit 85-t missaat peqataapput.