KANUKOKA pisortartaassaaq
Kommunit kattuffiani pisortatut Hans-Peder Barlach Christensen 48-nik ukioqartoq Kanukokap ukiuni 14-ini pisortarisimasaata Martha Labansenip ukiaq soraarninngortup taartissaatut atorfinitsippaat.
Kommunit kattuffiat misilittagartuumik pisortartaassaq, ilaatigut Namminersornerullutik Oqartussani atorfeqarsimasoq kingornalu kommunit siulersugaanerannut ineriartortitaanerannullu tunngasunik sivisuumik suliaqarsimasoq.
Aasiaat Kommunerisimasaani kommunaldirektøritut atorfeqarsimavoq, kingornalu Avannaani kommunit kattunneranni ataqatigiissaarisutut aamma atorfeqarluni. Tamanna sioqqullugu puisit neqaannik pølsiliorfimmi ajutoorutigineqartumi Puisimi aamma pisortaasimavoq.
Misissueqqissaarnerni inuiaqatigiinnut tunngasutigut nakkutigisassat suliassaqarfigalugit 2012-imit uuliasiortitseqatigiiffimmi Shellimi siunnersortaavoq.
- Taamaalilluta nuannaarutigaarput pisortamik atorfinitsitsisinnaagatta pisortat suliassaqarfiini allanngoriartortuni tamatigoortumik misilittakkani iluaqutigalugit kommunit Kanukoka aqqutigalugu suleqatigiinnerannik ineriartortitsinermi naleqqussaanermilu ataqatigiissaarisinnaasumik, Kanukokap siulittaasua Martha Labansen oqarpoq.
Pisortatut atorfinitsinneqartoq Danmarkimi inunngorpoq Kangaamiunili peroriartorluni, taassumalu sulilernissi qilanaarivaa.
- Pisortat suliassaqarfiini allannguutissat pisariaqartut naammaassiniarneqarneranni kommunit suleqatigiinnerata nukittorsaqqinneqarnissaannut aammalu Namminersorlutik Oqartussat kommunillu akornanni suliassaqarfiit agguataaneqarneranni allannguutaasariaqartut eqqarsaatigalugit peqataasinnaalluarsorivunga, Hans-Peder Barlach Christensen taama oqarpoq.
