PANAM2018 KANUKOKA Pan Am 2018-imut aningaasatigut tapersiivoq

KANUKOKA, Amerikap nunavittaani assammik arsarluni nunarsuarmi pissartanngorniunnissamut Nuummi juunip ulluisa 16-iannit 24-ata tungaanut anngunniuttoqarnissaanut 250.000 koruuninik tapiissuteqarpoq.
Assi © : Grønlands Håndbold Forbund
Allattoq Karsten Sommer
marsip 06-at 2018 10:54

Kommunit nunatsinni kattuffiata KANUKOKA-p atorunnaarnissaa pillugu piareersaasoqaleruttornera, KANUKOKA-p siulittaasuata Simon Simonsenip tusagassiutinut nalunaarummi erseqqissaatigaa, pigisallu nalillit nungusarneqarnissaat erseqqissaatigalugu.
Kommunit ilaasortat tassunga atatillugu timersornermut aningaasanik iluaqutissiisoqarnissaa aalajangeraat nalunaarutigineqarpoq. 

KANUKOKA-p atorunnaarsinneqarnissaanut siulersuisut, tassa siulittaasoq borgmesterillu sisamat, isumaqatigiillutik taama aalajangerput.

Aningaasat tapiissutigineqartut qaavisigut kommunit namminneerlutik tapiissuteqarniarunik tamanna namminneq isumagissagaat aamma isumaqatigiissutigineqarpoq:

- Nunatsinni assammik arsarnerup siuarsaavigineqarnissaa timersornerullu tapersersortuarnissaa pingaaruteqarluinnarpoq, tassami timersorneq inuiattut inuunerissaarnissatsinnut annertuumik tapertaavoq tamatigullu tapersersorneqarlunilu qiimmassarneqartariaqarpoq, nuannaaqaangalu paaseqatigiilluinnarluta Pam Am 2018-ip siullerpaamik nunatsinni ingerlanneqarnissaanut tapiissuteqaratta, KANUKOKA-p siulittaasua Simon Simonsen oqarpoq.