KANUKOKA-p kommunit nukittorsarusuppai
Kommuuninit aallartitat ullumi aqagulu ataatsimiinnissaminni eqqartugassaqangaatsiarput. Ataatsimiinnermilu eqqartorneqangaatsiartussat ilagivaat kommuunit aaqqissuussaanerat nutaaq januaarip aallaqqaataani 2009-mi atuutilersoq.
Ataatsimeeqataasummi ilaatigut nalilersuiffigisussaavaat isumaliutersuuteqarfigalugulu kommuunit kattutsinneqarnerat sutigut nukittorsaasimanersoq sutigullu nukittorsaasimannginnersoq, taamatuttaaq aamma kommunalbestyrelsinut qinigaarlaat suut pingaartillugit sulissutigisariaqarneraat suliassaqarfinnik iluarsaaqqinnerup kommunillu kattunnerisa kingorna, siunertaasut piviusunngortilluarsinnaajumallugit.
Malunnarporlu Naalakkersuisut kommuunillu isumaqatigiikannereersimasut piffissanngortoq nalilersueqqinnissamut. Naalakkersuisummi siulittaasuat, Aleqa Hammon, aallartitanut oqalugiarnermini oqarpoq Naalakkersuisut kommuninik aamma Kanukoka-mik suleqatiginnikkusuttut aaqqissuusseqqinnerup nalilersorneqarnissaani. Taamatullu aamma Naalakkersuisut suliassanik nutaanik kommuninut nuussiniartut. Kommunillu suliassanik nutaanik tigusinissaat innuttaasunut inuiaqatigiinnullu pitsaasumik sunniuteqartariaqartoq, aaqqissuusseqqinnerup siunertarisimasai najoqqutaralugit.
