KANUKOKA-p isornartorsiuinera Naalakkersuisut akissuteqarfigaat

Sanaartornermut tamakkiisumik aningaasaliissutit kommuninut sisamanut equngasumik agguataarneqartut, KANUKOKA-p naalakkersuisunut ammasumik allakkamini ilaatigut oqaatigaa. Sanaartornermulli tamakkiisumik aningaasaliissutit suliniutinut piviusunut agguataarneqartut naalakkersuisut oqaatigaat.
septembarip 20-at 2016 05:46
Nutserisoq Mads Lynge

Kommuneqarfik Sermersooq sanaartornermut aningaasaliissutit 71 procentiinik pisimasoq, kommunillu pingasut allat 29 procentinik pisimasut KANUKOKA-p kisitsisaataasa takutikkaat siulittaasuugallartup Simon Simonsenip naalakkersuisunut KANUKOKA sinnerlugu ammasumik allagaqaateqarnermini ilaatigut oqaatigaa.

Simon Simonsenili KANUKOKA-lu sanaartornermut aningaasat agguataarneqarnerat kukkusumik paasigaat, Naalakkersuisut maanna oqaatigaat.

Sanaartornermut tamakkiisumik aningaasaliissutinit 700 millionit koruunit missaanniittunit taakkunannga 185 millionit koruunit KANUKOKA-p matumani taamaallaat pigai, Randi Vestergaard Evaldsen oqarpoq.

Taamatulli inerniliisoqarnera tulluanngilaq, piffissarlu saqqummiunneqarfia eqquutinngilaq, Naalakkersuisoq oqarpoq.

- Sanaartukkani suliniutinut ataasiakkaanut aningaasanut inatsisissatut siunnersuummi agguataarsimanngitsut koruunit milliardit affaasa missaanniittut maannakkut sanaartugassanut agguaassassani sinaakkutissatullu aningaasaliissutini assigiinngitsorpassuarni uninngasuutigineqarput, tunngaviatigullu nunami tamarmi atugaasinnaapput, Randi Vestergaard Evaldsen, tusagassiuutinut nalunaarummi taama ilaatigut oqarpoq.

Pingaarnersiuinerli tamanna nuna tamaat isigalugu pisariunngitsumik agguataarinerinnaq pinnagu, nunamulli tamarmut tunngatitanik pilersaarutinik tunngaveqarluni najoqqutassanik annertunipilussuarnik attuumassutilinnik suliarineqarluartunillu aallaaveqartariaqartoq naalakkersuisup oqaatigaa.

Naalakkersuisut tamanna pillugu 2016-imut Nuna tamakkerlugu Pilersaarusiamut Nassuiaat naammassinialeruttoraat Naalakkersuisut nalunaarutigaat, "Pingaarnersiuinissaq pisariaqartinneqartoq"-millu qulequtserneqarsimasoq oqaatigalugu.