KANUKOKA-mut akiliinikinnerulernissaq Qeqqata Kommuniata kissaatigaa

- Isumaqatigisinnaanngilluinnarpara. Kommunit ataatsimoorfeqarnissartik pisariaqartilluinnaqqissaarpaat, Hermann Berthelsen oqarpoq.

Demokraatit Inatsisartuni politikkikkut oqaaseqartartuata, Niels Thomsenip, siunnersuutiga, KANUKOKA atorunnaassasoq isumaqarluni, kommunit sisamaannanngoreeramik, Namminersorlutik Oqartussanut oqaloqatiginninnissaminnut kattuffimmik akunneqartariaqanngitsut.

Kisianni tamanna Hermann Berthelsenip tassa isumaqatiginngilaa.

- Ilisimasatta ataatsimut katersuuffeqarnissaat, taamaalillutalu nipimik assigiissumik Naalakkersuisunut oqariartuuteqartarnissarput pingaartupilussuuvoq, borgmesteri oqarpoq.

Kommunit kattussuunnerisa kingorna borgmesterit sisamat akuttunngitsumik ataatsimut oqaaseqartarput. Taamaakkaluartoq KANUKOKA suli pisariaqartoq, Hermann Berthelsen, isumaqarpoq, allaffeqanngikkunik oqaloqatigiissutitik iluaqutaassangatinnagit.

Kommunit KANUKOKA-mut ilaasortaanerminnut 2010-mi 12,6 millioni koruuninik akiliissapput. Aningaasat taakkua kommunit namminneq atorluarnerusinnaagaat, Niels Thomsen isumaqarpoq.

Hermann Berthelsenillu isumaqatigiillluarsinnaavaa, KANUKOKA-p suliassai ikilimmata aningaasartuutit ikilisariaqarnerarlugit.

- Pisinnaasagut annertunerulernikuummata, taakkualu pillugit KANUKOKA-mut ikiortissarsiortariaqanngilagut. Tassalu KANUKOKA-p pisinnaasai allanngortitertariaqarput, pinngitsooratillu ikinnerulertariaqarlutik.

KANUKOKA-mi aallartitat maajip 19-ani 20-anilu ataatsimiinnissaannut Qeqqata Kommunianiit siunnersuutigaat, kommunit KANUKOKA-mut akiliutaat 20 procentimik appassasut. Taanna piviusunngussappat, KANUKOKA-p ingerlatsinerminut atugassai 10 millioni koruunit missaanniilissapput.

Inuit Ataqatigiinneersoq Bent B. Kristiansen Qaasuitsup kommuniani borgmesterip tulliata aappaara, aammalu KANUKOKA-mi siulersuisunut ilaasortaalluni. Taanna isumaqarpoq, KANUKOKA-p ataannarnissaannut apeqqut aallartitat ataatsimoorlutik isummerfigisariaqaraat. Kisianni:

- KANUKOKA-mi ataatsimeersuarnermi aallartitat oqariartuuteqartarput, saniatigut siulersuisut sulisarlutik. Uangalu isumaqarpunga, siulersuisut aallartitanut naleqqiullutik sunniuteqarpallaartut, aallartitallu sunniuteqarnerusariaqartut, Bent B. Kristiansen oqarpoq.