KANUKOKA: Matussanngilagut aaqqissuusseqqissaagulli
KANUKOKA-mik isornartorsiuineq, Demokraatit naalakkersuinermut tunngasunik oqaaseqartartuannit Niels Thomsenimit aallartinneqarpoq. Taassuma Kommunit kattuffiata atorunnaarsinneqarnissaa piumasaraa, oqarluni kommunit aaqqissuuteqqinneqarnerisa kinguneranik KANUKOKA atorfissaaruttoq.
Qeqqata Kommuniani borgmesterip Hermann Berthelsenip KANUKOKA-p ataannarnissaa kissaatigaa, taamaattorli isumaqarluni KANUKOKA-mut aningaasaliissutit ullumikkut ukiumut 12,5 millionit koruuniusut 10 millionit koruuninut ikilisinneqartariaqartut.
KANUKOKA-p siulittaasuata Enok Sandgreenip nutaamik aaqqissuussiniartoqarnera oqaatigaa, taamaattorli aamma oqaatigalugu KANUKOKA-p katersuuffittut pisariaqarnera erseqqissilluinnartoq.
- Ukiuni kommunit kattunneri peqatigalugit pisortatigut aaqqissuussinerit nutaat ingerlanniarneranni qitiusumillu oqartussaasunit suliassaqarfiit tigunissaannut piareersarnermi KANUKOKA-p ataqatigiissitsisutut atuunnera naleqartorujussuuvoq, peqatigiiffiup siulittaasua oqarpoq.
Ukioq 2013 nallertinnagu kommunit KANUKOKA-p qanoq iluseqarluni ingerlaqqinnissaa pillugu aalajangeeqataasussaapput, peqatigiiffiullu aallartitaasa maajiuliinnartoq ataatsimiinnissaanni oqaluuserisassaq taannarpiaq oqaluuserineqaqqissalluni.