Kanukoka: Kommuneqarneq Juuntaap pingaartitaraa

Jonathan Motzfeldtip toquneratigut innuttaasut qanimut oqartussaaqataanerannik pingaartitsisumik annaasaqarpugut. KANUKOKA-p siulittaasuata Enok Sandgreenip Jonathan Motzfeldtimik eqqaaniutitut oqaaseriumasai taama aallartipput.
Allattoq Louise M. Kleemann
oktobarip 29-at 2010 11:47

Ukiorpassuarni politikeritut sulinermini nuannaajallatsitsisarsimaqaaq kommunit nammineersinnaatitaaneranni, nunaqarfinni aqutsisoqarnermi ilagiillu sinniisoqarneranni tunngaviit eriagisassat qamannga pisumik eqqartuleraangamigit. Taamaalilluni inunnut allanut kajumissaarisuusimavoq aaqqissuussinerit tamakku pimooruteqqullugit.

Soorlu Henrik Lundimik, Kujataani kommunalpolitikerimik ilisimasaqarluartumik erseqqissuliullaqqissumillu, ikinnguteqarnermigut attaveqarluarnermigullu kommuneqarnerup qanimut oqartussaaqataanikkut innuttaasunullu sullissinikkut inissisimaffianik pingaartitsinini ineriartortissimavaa. Taamaalilluni aamma kommunini iluarsaaqqinnissamut kommissioni 1992-imiit 1994-imut sulisoq siulittaasuuffigaa.

Kommunini ingerlatsinermut atatillugu Jonathan Motzfeldtip immikkut soqutigisai atuartitaanermut kulturimullu tunngasuusimapput, taamaattorli pingaartitsinera kommunini ingerlatsinermut tamarmut sunniuteqarluarsimavoq.

Nulia, meerai ilaqutaasullu tamaasa uummammik pisumik kattuffiup misigeqatigai.

Eqqaaneqarnera ataqqinartuuli.

Inussiarnersumik

Enok Sandgreen KANUKOKA-p siulittaasua

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq