Kanukoka: Kommunalbestyrelsit ataatsimiinnerisa aallakaatittarnissaannut KNR2-p atorneqarsinnaanera isumassarsiatsialaavoq
- Kommune Kujallermi kommunalbestyrelsip ataatsimiinnerisa KNR-ip kanaliata aappaa atorlugu aallakaatinneqartarnissaannik siorna isumaqatigiissutip pitsaasunik misilittagaqarfiulereersimanera innersuussutigalugu matumuuna kaammattuutigerusuppara Kommuneqarfik Sermersuumit tamatuma assinganik kissaateqartoqarsimanera aamma ilassilluarneqassasoq, Martha Abelsen kultureqarnermut naalakkersuisumut Nick Nielsenimut taama allappoq.
- Aammami kommunit kattunnissaat piareersarneqalermalli KNR isumalluutitut taaneqartarsimavoq kommunini isorartoqisuni innuttaasut peqatigiillutik misiginerulernissaannut iluaqutissatut atorluarneqarsinnaammat.
Qeqqata Kommuniani najukkami radio atorlugu kommunalbestyrelsip ataatsimiinnerisa toqqaannartumik aallakaatinneqartarnerisigut innuttaasunik akuutitsisarneq ukiorpanni ingerlanneqareersimammat, aaqqissuussinerlu taanna Qeqqata Kommuniata iluatigalugu ingerlatiinnarusuppaa. Qaasuitsup Kommunianilli soqutigineqartoq, Kanukokap siulittaasua allappoq.
KNR-ip kanaliata aappaata qaammarsaanerup nalinginnaasumik qaffassarneqarnissaanut atuneqarnissaa tamakkiisumik taperserpaa, assersuutigalugu ”inuiaqatigiit ilisimatusarfiat” TV-ikkoortoq inuiaqatigiilerinermut, teknikkimut, aningaasaqarnermut, oqaluttuarisaanermut oqaasilerinermullu tunngasutigut oqalugiarnernik ingerlataqarfiusoq pilersinneqarsinnaassalluni, najukkani oqartussaaqataanerup innuttaasullu nalinginnaasumik qaammaasaqassusiata qaffassarneqarnissaannut atorneqarsinnaassalluni, Kanukokap siulittaasua naggasiivoq.
