KANUKOKA: Kimik IT 17,2 mio. koruuninik akiliissaaq
Kalaallit Nunaanni Kommunit Kattuffiata, KANUKOKA-p, aalajangiusimavaa qarasaasialeriffik, Kimik IT, katillugit 17,2 millioni koruuninik akiliisitaassasoq, tamanna eqqartuussivissuarmit Østre Landsretimit, qaammammi uani siusinnerusukkut aalajangiunneqarpoq. Sermitsiap nittartagaani tamanna atuarneqarsinnaavoq.
Allattoq Louise M. Kleemann
- Pisup eqqartuussiveqarfikkoorlugu inaarsarneqarnissaa aallartitatta aalajangerpaat. Eqqartuussut qaangiataaginnarsinnaanngilarput, KANUKOKA-mi direktøri, Martha Labansen, Sermitsiamut oqarpoq.
Martha Labansenip ilutigalugu erseqqissaatigaa, KANUKOKA isumaqatigiisitsiniarsimagaluartoq, Kimik IT-lli tamanna soqutigisimanngikkaa.
17,2 millioni koruunit, eqqartuussut naapertorlugu, kingusinnerpaamik ippassaq akilereerneqarsimasussaagaluarput, taamali pisoqarsimanersoq Matha Labansenip ippassaq oqaatigisinaanngilaa.
Kimik IT-mi direktøri, Ian Wennerfeldt, Sermitsiaq naapertorlugu, pisumut oqaaseqarusunngilaq.