KANUKOKA isumaqarpoq Namminersorlutik Oqartussat pikkorinnerusariaqartut

Naalakkersuisut "Kommunit pillugit nassuiaataata" Inatsisartuni oqallisigineqarnerata kingorna pisariaqalerpoq, kommunit suliassaqarfinnik Namminersorlutik Oqartussanit tigusinissaminnut qanoq kajumitsiginerannik, tigusiniarnermullu apeqqutinik aporfiusimanerannik erseqqissaateqarfigissallugit.
Allattoq Carla Davidsen
oktobarip 09-at 2011 15:19

Isak Hammond Inuit Ataqatigiinneersup, kommunit Namminersorlutillu Oqartussanit suliassaqarfinnik tigusinissamut tunngatillugu piumassuseqarnerunissaannik ujartuinera KANUKOKA-mi siulittaasup, Martha Abelsenip, maluginiarpaa.

Erseqqissartariaqarpoq kommunit suliassaqarfinnik Namminersorlutik Oqartussanit tigusinissaminnut piumassuseqarluinnarmata. Kisiannili suliassaqarfinnik tigooraaneq ullumikkornit sukkanerusumik ingerlanneqassappat, Namminersorlutik Oqartussat taamatuttaaq politikkikkut allaffissornikkullu piumassuseqarluinnartariaqarput, KANUKOKA-mi siulittaasoq, Martha Abelsen, tusagassiuutinut nalunaarummini erseqqissaavoq.

- Tigooraaniarneq kigaannerpaaffissaanut inissinneqarsimavoq, apeqqutigineqaraluartut akineqarneq ajormata, Namminersorlutillu Oqartussat kiisami iliuuseqaraangamik suliassaqarfiit amigartunik aningaasartalerlugit tunniutiinnartarmatigik, Martha Abelsen oqarpoq.

Suliarlu sukkatinneq ajorpoq Namminersorlutik Oqartussat politikeriisa atorfilittaasalu kommunit isertitaasa Namminersorlutik Oqartussat isertitaannit pitsaanerusumik ineriartorsimanerannik apeqqut assut eqqarsaatigeqqajaasarmassuk. Apeqqullu tamanna suliassanut pineqartunut immikkut pingaaruteqanngikkaluarpoq, nalunngikkaanni kommunit aningaasartuutissaat amerliartuinnarsimasut, KANUKOKA-mit isumaqarput.

KANUKOKA-p tusarniaanermut juunip ulluisa 30-anni akissutaani Naalakkersuisunut ilaasortaq Anthon Frederiksen kattuffimmit isornartorsiorneqarpoq, kommunit pillugit nassuiaammut atatillugu tusarniaaneq ingerlaannartumik qisuariarfigisimanngimmagu.