KANUKOKA: Inuit sumi najugaqarnerat apeqqutaassanngilaq
- Erseqqivissumik akiinnarsinnaavara taanna kommunininngaanniit isumaqatiginngilluinnaratsigu, Martha Abelsen oqarpoq.
Naalakkersuisut malissagaanni kommuninut aningaasaliissutit immikkoortiterneqartariaqarput, soorlu atuarfeqarfinnut paaqqinnittarfinnullu aningaasat millillugit utoqqarnut aningaasaliissutit allillugit- inuiaqatigiit agguataarnerat apeqqutaatillugu:
- Tassa toqqaannavissumik aningaasanik arsaarinninnissaq taanna pineqanngilaq. Kommunit kommunillu kattuffiata oqaloqatigineqarneri qaammatini ukunani tassaapput suliassani tamatta pingaartitatsinnik tunngasunik ataatsimoorluta aningaasalersueqatigiinnissarput. Tamaannalu oqaloqatigiinneq ajunngitsorujussuarmik ingerlasutut uanga nalilerusuppara. Tassalu soorlu meeqqanut tunngassuteqartuni aammalu innuttaasunut sullissinermut tunngassuteqartuni suliassat ataatsimoorussassagut ilusilersorpagut aammalu aningaasalersueqatigiinnissaq angujartorlutigu, Naalakkersuisut siulittaasuat Kuupik Kleist oqarpoq.
KANUKOKA-miit isumaqarput kommunit nunatta karsia aningaasakilliormat ikiueqqinneranik kinguneqassasoq, illuatungaanili kommunit pisariaqartitsigaangata qaqutigut tapiisoqaqqittarnerarlugu:
- Alloriarneq allaanerusariaqarpoq, 2010 2011-milu ilanngaaffigereernikuaat annertoorujussuarmik taavalu aamma maannamut kommunit aningaasartuutigisartagaat annikinnerusumik aningaasaliiffigineqartareermata neriuppugut 2012-mi isumaqatigiissutigisinnaasarput suli neriulluarfigivarput annertunerusumik, Martha Abelsen oqarpoq.
Kommuninut ataatsimoortumik tapit pillugit isumaqatigiissutiginiarneri ukiup tulliani aningaasanut inatsip akuerineqannginnerani naammassisimassapput.