KANUKOKA: Innuttaasut atugaat salliutinneqarput

Naalakkersuisut siulittaasuata Kuupik Kleistip ukiortaami oqalugiaammini ilaatigut oqaatigaa kommunit kattussuunneqarnerisa kingorna suliassatut aalajangiussat arlalitsigut kinguaattooqqasut.

- Innuttaasut atugaasa assigiissarneqarnissaat kommunit salliutinnikuuaat, suliarlu taanna ilimagisamiit sivisunerusimavoq, KANUKOKA-p siulittaasua Enok Sandgreen oqarpoq.

Kommunilli oqaloqatigisarpavut, Anthon Frederiksen oqarpoq:

- Suliassanik tigusinissamut tunngasut pillugit KANUKOKA kommuninut tusarniaaqqammerpoq, tusarniaassutillu qanittukkut tiguavut. Naalakkersuisoqarfiit matumunnga susassaqarfiusut kommuninut tusarniaassutigineqarsimasut naliliiffigisussaavaat, kiisalu Naalakkersuisut, KANUKOKA kommunillu akornanni ungasissorsuunngitsukkut ataatsimiittoqarumaarpoq. Suliassaqarfiit kommuninut sapinngisamik pitsaanerpaamik tunniunneqarnissaat matumani anguniarneqarpoq, Nunami namminermi pissutsinut naalakkersuisoq Anthon Frederiksen oqarpoq.

Inatsisartunut qinersineq kommunit kattussuunneqarnerannut atatillugu suliassanik kinguaattoortitsisoq, KANUKOKA-p siulittaasua Enok Sandgreen oqarpoq, innuttaasullu atugaasa assigiissaarneqarnissaat pillugu suliap ilimagisamiit sivisunerisimanera oqaatigalugu.

- Kommunit namminneq suliassaqarferujussuaq tigusimasartik salliuteqqaarusunnikuuaat, tassa innuttaasut atugaasa assigiissarneqarnissaannut suliassaq annertoorujussuummat. Suliassaqarfinnik tigooraanissartik tunuarsimaaqqugallarnikuuaat, tassalu taanna malinneqarluni. Taamaaliortoqarsimanngitsuugaluarpat suliaq oqimaannerussagaluarpoq, innuttaasunut sullissinermullu annertuumik kalluaalluni, KANUKOKA-p siulittaasua Enok Sandgreen oqarpoq.