KANUKOKA: Inatsisartut erseqqissuliorilik!
Kommunit aaqqissuuteqqinneqarnissaat inatsisartuni aqagu oqaluuserineqassaaq. Kommunit kattuffianni KANUKOKA-mi siulittaasuugallartup Karl Lyberthip neriuutigaa Inatsisartut erseqqissumik nalorninaatsumillu tikkuussissasut.
- Naatsorsuutigilluinnarparput Inatsisartut nalorninaatsumik aqagu tikkuussissasut, taamaalilluni kommunit iluamik aallartilluarsimanngitsut nalorniunnaarlutik sulillutik aallartissinnaaniassammata, taama oqarpoq KANUKOKA-mi siulittaasuugallartoq Karl Lyberth. Taanna isumaqarpoq, nutaamik aaqqissuusseqqinnissaq pisariaqarluinnartuusoq, taamatuttaaq kommunit akisussaaffimmik tigusinissaminnik piareersimareersut.
- Aaqqissuusseqqinnerup kingornatigut kommunit qitiusumik inissinneqassagaluarput, aaqqissuusseqqinnermimi siunertaavoq kommunit akisussaaffinnik annertunerusunik tigusinissaat. Kommunit piareersimapput akisussaaffimmik angisuumik tigusinissaminnik, oqarpoq.
Karl Lyberth aamma oqarpoq suliassat Namminersornerullutik Oqartussaniit kommuninut nuunneqarpata aningaasat 1 milliaartit tungaanut amerlassusillit sipaarneqarsinnaassasut.
- Aaqqissuusseqqinnermi siunertaarpiarpoq allaffissornerujussuup annikillinissaa, taava taassuma kingunerissavaa suliassat ikigisassaanngitsut 1 milliaartit tungaanut nalillit Namminersornerullutik Oqartussaniit kommuninut nuutsinneqarnissaat. Soorunami taava kingunerisinnaavaa nuna tamakkerlugu qinikkat ikinnerulernissaat, taama oqarpoq KANUKOKA-mi siulittaasuugallartoq Karl Lyberth.
