KANUKOKA atorunnaarpoq
Kalaallit Nunaanni kommuneqarfiit kattuffigisimasaata KANUKOKA pisortatigoortumik ippassaq juulip 31-ani atorunnaarpoq.
Allattoq Jens Thorin
aggustip 01-at 2018 09:17
KANUKOKA pisortatigoortumik maanna atorunnaarpoq.
Kattuffik, juulip 24-iani 1972-imi pilersinneqartoq, ukiuni 46-ini kommuuneqarfiit kattuffigaat.
Kisianni Kommuneqarfik Sermersooq kommunit kattuffianniit tapersersorneqanngitsutut naliliilluni KANUKOKA-miit januaarip aallaqqaataani 2016-imi ilaasortaajunnaarpoq.
Ukioq mannalu aallartimmat Qaasuitsup Kommuniata avinneqarnerata kingorna Kommune Qeqertalik aamma KANUKOKA-mut ilasortaajumanani nalunaaruteqarpoq.
Massakkullu kommuneqarfiit tallimaasut borgmesteriisa siunissami qanoq ilusilimmik suleqatigiiffeqassanerlutik oqaluuserisussanngoraat, KANUKOKA-mi siulersuisunut ilaasortaq SIverth K. Heilmann ilisimatitsivoq.
Tamannali pillugu borgmesterit qaqugu ataatsimiissanersut, oqaaseqanngilaq.