KANUKOKA ataatsimiilissaaq
Kommuneqarfiit kattuffiata, KANUKOKA-p, aallartitanik ataatsimiisitsinera Ilulissani ullumi aallartippat, kommunit aaqqissuuteqqinnissaat eqqartorneqartussanut annertuunut ilaavoq, nunatsinni kommunit qanoq amerlatiginissaat ilaatigut eqqartorneqassalluni.
-Neriuppunga inatsisartunut Namminersornerullutillu Oqartussanut erseqqissumik oqariartuuteqarsinnaassalluta, peqataasussallu eqeersimaarlutik qiimallutillu oqallikkumaartut, KANUKOKA-mi siulittaasuugallartoq Karl Lyberth oqarpoq.
KANUKOKA-p siulersuisui ippassaq ataatsimiinnerminni aalajangerput, Qaanaap aningaasaqarnerata najummassimanartorsiornera eqqarsaatigalugu, Qaanaap Kommunianut innuttaanullu tapersersiummik nalunaaruteqarniarlutik. Siulersuisut naqissuserpaat, aningaasaqarnertik ingerlanerlulersoq kommunip 2003-mili nalunaarutigisimagaa, taamanilu siunnersuutigineqarsimagaluartoq, Pituffiimmiit akileraarutaasut Qaanaami inuussutissarsiutitigut siuarsaanissamut atorneqarnissaat. Aningaasat ullumikkut nunatta karsianut tuttarput.
