KANUKOKA aqagu ataatsimeersualissaaq
Oqaluuserisassanut ilaavoq, kommuneqarfiit kattussuunnissaanni maannamut killiffik. Matumani eqqartorneqassalluni suliassat, Namminersornerullutik Oqartussat ingerlataat, sorliit, kommunenit tigorusunneqarnersut tiguneqarsinnaanersullu, tiguneqassappatalu qaqugu tamanna pisinnaanersoq.
Maannamulli aaliangiunneqareersoq malillugu kommunerujussuit sisamat, januaarip aallaqqaataani 2009-mi aallartinnerminni, maannamut ingerlateriikkatik ingerlatiinnassavaat, akisussaaffiillu nutaat aatsaat 2010-mi tunniunneqarsinnaassallutik. Pineqartulli pillugit ataatsimeersuarnerup naammassinerani annertunerusumik paasisaqartoqarsinnaassaaq.
Ataatsimeersuarnermi siulersuisussanik nutaanik toqqaasoqassaaq, nutaamilli siulittaasunngortoqassanersoq maannangaaq oqaatigineqarsinnaanngilaq. Taamatuttaaq isummerfigineqassaaq siulittasunngortussaq tamakkiisumik imaluunniit ilaannakortumik atorfinitsinneqassanersoq.
Taamatuttaaq kommunerujussuanngortussani sisamaasuni borgmesterinngortussat siunissami KANUKOKA-p siulersuisuini ilaasortaasassanersut isummerfigineqassaaq.
Sisamanngorneq ilanngullugu ataatsimeersuartoqassaaq, ataatsimeersuarnerlu qanimut radioaviisimiit malinnaaffigineqassalluni, susoqarnersoq qanorlu aalajangiisoqarnersoq ilisimatitsissutigineqartassalluni.
