KANUKOKA: Aningaasanut inatsit eqqarsaatigilluagaanngilaq
Borgmesterit KANUKOKAlu allagaqarnermini erseqqissarpaat kommunini innuttaasunik kiffartuussinerup nutarterneqarnissaata piareersarneqaleruttornerani kommuninut ataatsimoortumik tapiissutit ukiumut 36 mio. kr.-inik sipaarniarfigineqarniarnerat akornutaalersussasoq tamattumalu kinguneriumaaraa kommuunini sulisut 75-it suliffitik annaasaagaat.
Nunaqarfinni sanaartugassat illuliortiternerullu ukiumut 45 mio. kr.-inik annikillilerniarneqarnerat, tamatumalu peqatigisaanik inissialiortiternerup sumiiffimmut aalajangersimasumut eqiterlugu sumiiffinni allani sanaartornerup unikaallarujussuartinniarneqarnera, aaqqissuussaanermik iluarsaaqqinnerup siunertaasa pingaarnerit ilaannut akerliuniarnertut misigeqqajaanarnerarlugu borgmesterit sisamat KANUKOKAmilu siulersuisut naalakkersuisuinut allagaqarnerminni taamatut allapput.
Namminersorlutik Oqartussani oqartussaaffiit kommuninut nuunneqarnissaat ullormi ataatsimi pinavianngilaq, kisiannili 2013-ip tungaanut ingerlanneqassalluni suliassaqarfiit aningaasartaat kommuunit nunalu tamakkerlugu naalakkersuinermik suliaqartut akornanni isumaqatigiissutigineqareermata.
Kommunit ilinniartitaanikkut immikkut ittumik siuarsaanissamut maannamut 80 mio. kr.-inik akiliuteqarsimammata ataatsimoorluni tapiissutini sipaarutitut akiliutigineqarsimanerat kommuunit borgmesteriisa KANUKOKA-llu siulersuisuisa maluginiarpaat. Tamakkua pinngitsoortinniarlugit Kommunit ataatsimoorlutik Naalakkersuisunik oqaloqatiginnikkusullutik tusagassiutinut allagaqarput.
