KANUKOKA allamik siulittaasortaarallarpoq
KANUKOKA ippassaq siulittaasortaarpoq. Toqqaanermili siulersuisut isumaqatigiissimanngillat.
KANUKOKA siulittaasuugallartussamik toqqaammaat qanoruna pisoqarami?
Siulittaasup Lars Karl Jensenip napparsimanerani parteeqataa Karl Lyberth siulittaasuugallartussatut toqqarneqarpoq.
Aalajangiinermili KANUKOKAmi siulersuisut isumaqatigiissimanngitsut paasinarpoq. Ilaasortanit sisamaasunit pingasut Karl Lyberthimik toqqaapput, ataaserlu taaseqataanani.
Nalinginnaasuuvormi taama pisoqartillugu siulittaasup tulliata siulittaasumik taarsiisarnera. Taamaaliortoqarsimanngilarli; siulittaasummi tulleraa Nuup borgmesteria Agnethe Davidsen. Malittarisassalli malillugit Agnethe Davidsen siulittaasunngorsinnaanngilaq. Eqqarsartoqarsinnaagaluarporlu siulittaasup tulliata aappaata siulittaasunngortinneqassasoq, tassalu Atassummeersoq Knud Kristiansen.
KANUKOKAlli suleriaasiani malittarisassani tamanna ilaatinneqanngilaq. Knud Kristiansenip aalajangiineq akuersaarnerarpaa; KANUKOKAlli malittarisassaasa qanoq aaqqissuunneqarsimaneri paaserusunnarsipput. Knud Kristiansen pisumut annerusumik oqaaseqarumanngilaq.
Siulittaasuugallartunngortoq KANUKOKAp tulliani ataatsimeersuarnissaata tungaanut, tassalu maajip 17-iani 18-ianilu pisussap tungaanut siulittaasuussaaq.
