KANUKOKA: 8 millioner koruunit kommuunit kattussuunnisaannut amigarput!

Kanukokap siulittaasuata tullia Karl Lyberth kommuneni nutaassani borgmesteriulersussat taperserlugit maanna suaaruteqarpoq, 2009-mi januaarip aallaqqaataani kommunit kattussuunnissaannut naalakkersuisut tapiissutaat 8 millioner koruunit amigarluinnarnerarlugit.
Allattoq Jaaku Lyberth
juulip 18-at 2008 15:56

Karl Lyberth tamanna pillugu ima oqarpoq:

-Taakkua 8 mio. koruunit sinnilaarlugit tapiissutaasimasut naalakkerusisuninngaanniit, paasinarsivoq ikaarsaariarnermut ataatsimiititaliap piareersarnissaanut atugassat amigarluinnartut. Taamaattumi pisariaqarluinnarpoq taakku aningaasanik amerlanernik tunineqarnissaat. Taamaammat qujanarpoq ikaarsaariarnermik ataatsimiititaliami siulittaasui sisamat naalakkersuisunik oqaloqateqarsimammata ajornartorsiutip aaqqinneqarnissaa pillugu, Karl Lyberth oqarpoq.

Aperaarput isumaqarnersoq naalakkersuisut iluamik paasinninnatik tapiissuteqarsimanersut, ima akivoq:

-Aap, eqqarsariarnarpoq immaqa naalakkersuisut tamanna erseqqissumik immaqa paasisimanngilaat, imaluunniit, naluara sumik patsiseqarsimanersut. Naluneqanngitsutummi pilersaarutit piviusunngorpata akisussaaffippassuit inatsisartuniit kommuninut nutaassanut tunniunneqartussaapput. Akisussaaffiit tigoorarnerini inatsisartut naalakkersuisullu aningaasanik kommuninut erliguussitigissappata taava siunissaq assut annilaanganarsinnaavoq, kommuninilu taakkunani sisamani nutaassani artornarsinnaavoq taamatut naalakkersuisut inatsisartullu ingerlaannassappata, Karl Lyberth nassuiaavoq. Aperaarput pissutsit taamaaginnassappata, kommunini aaqqissuusseqqinniarnernermi ajortumi ingerlalersinnaanissaa, imatullu akissuteqarpoq:

-Soorunami pitsaanerusumik ingerlasoqalertussaavoq pitsaanerusumik atugassaqartinneqarpata, pitsaanerusumillu sulineq ingerlasussaavoq aningaasat amerlanerit tunniunneqarpata, kisiannili amerlineqanngippata sulineq ajornerusumik ingerlanneqassaaq, annilaanganarsinnaavorlu tusiapittumik aallartissinnaanissaat, Karl Lyberth oqarpoq. Apereqqipparput Kanukokamiit naalakkersuisut tamanna pillugu ataatsimeeqatigilersaannginneraat, tamannalu ima akissuteqarfigaa:

-Soorunami kommuni sinnerlugu sulisussaavugut, aamma paasivakka tusarlugillu taakku siulittaasut sisamat naalakkersuisut siulittaasuat ataatsimeeqatigisimagaat, taamaattumik iluaqutaassaaq Kanukokamiit naalakkersuisut saaffigigutsigit oqarluta; una ajornartorsiut imaannaanngilaq taamaattumik oqaloqatigiissutigisariaqarparput aaqqiissuteqarfiginiartariaqarlutigulu. Aap ataatsimeeqatiginiartariaqarpagut naalakkersuisut aasaq manna sulinngiffeqareerlutik angerlariarpata, taama oqarpoq Kanukokap siulittaasuata tullia Karl Lyberth. Aamma oqaatigaa ikaarsaariarnermut ataatsimiititaliap sulinera iluamik ingerlassappat aaqqissuusseqqinnissamut aningaasat 30 mio. koruunit tungaanut suli amigaatigineqartut.