Kantiina akimasuumik neriniartarfiliarineqarpoq

Aasianni aalisakkerivimmi sulisuusimasut maannali suliffissaarutsinneqarsimasut, neriniartarfimmik akimasuumik ammaanissaannut pikkorissartinneqarput.

Aasianni neriniartarfimmik akimasuumik soqanngilaq.

Aasiannilu aalisakkeriviup kantiinaa allatulli kantiinatut isikkoqarsimagaluartoq, maanna allanngorluinnarpoq, tassami iikkat annoraaminernik kusassakkanik pinnersaasersorneqarsimapput, naterlu kusanartumik natersualersorneqarsimavoq, taassumalu qalipaataanut tulluartunik nerriviit qalilerlugillu naneruusersorneqarsimapput, kiisalu ajissaatit saviillu qillarissaqqissaagaallutik. Aammalumi igasut tjenerillu tamarmik, pissusissaatut atisaqarillutik.

Pikkorissaasut Royal Greenland akademi kantiinaasimasumut tassa taamak isersimaffigiumanarsaasimatigipput.

Inuillu 56-t inniminniisimariarunik taqqamani nerisinnaatitaapputtaaq.

Raajaleriffimmi sulisut inuit 50-t missaat tamarmik, pikkorissaqataanissamut periarfissinneqarput.

Ataqatigiissaarisoq Inger Eriksen aperaarput, sooq taama aaqqissuussisoqarsimanersoq.

- Pikkorissartut paasillugulu malugissammassuk nammineq aallartitsineq qanoq ittuunersoq, illoqarfimmiut sunnerneqassappata suut atortut iliuusissallu iliuuserineqassanersut, Inger Eriksen oqarpoq.

Unnugu ammaanermi Aasianni borgmesteri allunaasamik siilikimi kipissanerarpaat oqalugiarlunilu.

Pikkorissaqataasut ilaat Klara Larsen aperaarput, pikkorissaqataasuulluni qanoq innersoq.

- Pikkorissartaleramali aatsaat taamak nuannertigisumik misigisaqarpunga, inuusukanneraluaruma taamatut ittumik ammaassagaluarpunga, oqarpoq.

Aasianni Royal Greenlandip raajaleriffia oktoberip naanerani matuneqarpoq.

Taamalu neriniartarfeqartitsineq decemberip 15-iata tungaanut ingerlassalluni.