Kanonen Kangerlussuarmi ammaavoq
- Meeqqanut inuusuttunullu Nunatsinni sullissivinni paaqqinnittarfinnilu nalinginnaasuni sullinneqarsinnaanngitsunut Kalaallit Nunaanni naleqquttunik paaqqinnittarfeqannginnera sivisuumik ajornartorsiutaasimavoq. Perorsaanerup tarnip nappaataanillu sullissinerup akunneranni sullinneqarnissamik pisariaqartitsisunut. Amigaatigineqartoq "Kanonen"-ip maanna naammassisinnaanngorpaa. Taamaaliornikkut inuusuttut kulturimi inersimasunngornerminni akuuffigisassaminniiginnarnissaat qulakkeerneqassaaq.
Kanonenip Kangerlussuarmi immikkoortortaqarfia danskit sullissivianit "Kanonen"-imit pilersinneqarpoq, sullissiviup Jyllandimi Hadstenimi meeqqanik inuusuttunillu taamatut ikiortarialinnik ukiuni arlalinni sullissisimavoq. Taamaatut suliaqarnikkut immikkut ilisimasat, Nunatsinni suli pigineqalinngitsut, pissarsiarineqarsinnaasimapput. Tamannali piffissap ingerlanerani angujartuaarneqassaaq, "Kanonen"-immi angerlarsimaffimmi taama ittumi suliassanut immikkut ittunut sulisunik kalaallinik ilinniartitsissamaarpoq.
-Inuusuttunik isumaginninnikkut ikiortarialinnik sullissineq ukiunik qulinik misilittagaqarfigaarput. Taamatut sullissinermi ilisimalikkavut Kalaallit Nunaanni siaruaakkusuppagut. Danskit kalaallillu sulisorineqassapput. Aningaasaliissutigineqartut atorlugit sulisorisatta kalaallit siornatigumut naleqqiullugu qaffasinnerusumik ilinniartinnissaannut periarfissaqalissaagut, Trine Pfeiffer, "Kanonen"-imik ulluinnarni aqutsisuusoq Århus Stiftstidendemut oqaluttuarpoq.
"Kanonen"-imi perorsaasut kalaallit inuusuttunik ikiortarialinnik sullissinermik ilinniartinneqassapput, aamma perorsaasut "Kanonen"-imi sulisut ilinniartinneqarnissaat pillugu suleqatigiinnissamik Perorsaanermik suliatigut Ilisimaqarfik Ilulissaniittoq isumaqatigiinniarfigineqarsimavoq. Isumaqatigiinniarnerit taakku suli naammassineqanngillat. Ingerlatsineq nalinginnaasoq kommunit inissiisut inissiinermut akiliutaannit aningaasalersugaassaaq. Ulloq unnuarlu paaqqinnittarfeqartitsinissamik neqerooruteqarnerup ukiut tallimat missaat qaangiuppata kalaallinut tamakkiisumik tunniunneqarnissaa siunertarineqarpoq.
-Matumani suliniutaasoq Kanonenimut pingaaruteqartupilussuuvoq. Suliniutaasoq immini pissanganartupilussuuvoq, aammali ukiorpassuit ingerlanerini ilisimalikkatta maanna kulturini allani atorneqarlutillu iluaqutaasinnaanerat nuannaarutigaarput. Aningaasaliisoqarneratigut suliassap takorluukkatsitut piviusunngortinnissaanut periarfissinneqarpugut, Trine Pfeiffer oqarpoq.
