Kannguttaatsuliortartunut ullumikkut inatsiseqanngilaq
Tamanna sulisussarsiornermi atorfinitsitsinermilu malittarisassat pilersinneqarnerisigut pinaveersaartinneqarsinnasoq, Paarisamit saqqummersinneqartumi 1999-imili nalunaarusiaarineqaraluarpoq.
Kannguttaatsuliorsimasulli meeqqerivinni atuarfinniluunniit atorfinissinnaannginnerannut ulloq manna tikillugu inatsiseqanngilaq.
Paarisami pisortaq, Bodil Karlshøj Poulsen oqarpoq, soorunami taamatut inatsisiliornissaq pisariaqartinneqaraluartoq.
Soorlu nnunani allani aamma taamaattoqartoq, Kalaallit Nunaanni meeqqanik kinguaassiuutitigut kannguttaatsuliorniartoqartartoq ukiunimi kingullerni qulini tusartuarparput. Taamaammat qanoq iliuuseqartoqarsinnaanera pillugu immikkut ilisimasallit, suliaminnullu atatillugu kalluarneqartartut 250-it 1999-imili oqallitsippagut. Taamanikkulli oqaatigineqarpoq kanguttaatsuliorsimasutut pillarneqarsimasoq meeqqarnut attuumassuteqartunik suliaqassanngitsoq. Politikkikkut oqallisigineqartaraluarluni sooq suli inatsisiliuunneqarsimannginnersoq naluara, Bodil Karlshøj Poulsen oqarpoq. Inatsisartut 2005-imi 2007-imilu aalajangeraluarpaat, meeqqanut kannguttaatsuliortartut meeqqanut attuumassatilinnik suliaqartinneqarnaveersaassasut, sulili manna tikillugu inatsisiliortoqarnikuunngilaq. Kommunit timersornermillu suliallit namminneq piumassusertik naapertorlugu atorfinitsitatik pillaagaasimanersut misissortarpaat. Paaqqinnittarfiilli atorfinitsitamik pinerlussimanerannut atatillugu paasiniaasinnaasutut inatsisitigut pituttorsimatinnagit, meeqqanut kannguttaatsuliortartut paaqqinnittarfinni suli atorfininniarsinnaapput, Bodil Karlshøj Poulsen oqarpoq. Meeqqanut kannguttaatsuliortartut allatuulli silatutigaat, taamaammallu pinerlussimanerminnut atatillugu arlaanni misissuisoqarnavianngitsoq nalunngikkunikku tassani suliffissarsiorsinnaavoq. Taamaammat taamatut pisoqartarnissaa pinngitsoorniarlugu inatsisiliortoqartariaqarpoq. Inatsisiliortoqarpat kannguttaatsuliortartut, meeqqanillu kinguaassiuutitigut pinngitsaaliisimasut meeqqanut qanillattorniartarnertik akuerineqarsinnaanngilluinnartoq paasissagaluarpaat, Paarisami pisortaq, Bodil Karlshøj Poulsen oqarpoq.
Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmiit qaqugu taamatut inatsisiliortoqarsinnaanera oqaatigisinnaannginnerarpaat.
