Kannguttaatsuliornerit ammanerusumik eqqartoqquneqarput
Meeqqat kinguaassiutimikkut atornerlunneqarsimasut paasineqaraangata inuiaqatigiit qanoriliortarpat ?– tamanna naammaginarpa ?
Nunatsinni Inuiaqatigiilerinermik Sammisallit suleqatigiiffiata InuiSa-p ataatsimeersuarnerani ippassaq apeqqutit imaqqortoorujussuit oqallisigineqarput.
- Iliuuserisartakkagut naammanngillat piureersullu ujartortarneri piffissaajaatigisarpagut, oqalliseqataasut ilaat namminersorluni ilaqutariinnik siunnersuisarfiutilik Nukákuluk Kreutzmann taama isornartorsiuivoq.
- Ima eqqaamanerluttartigaagut allaat nunanit allanit immikkut ilisimasalinnik tikisitsisarluta naak nunanitsinni immikkut misilittagalinnik peqaraluarluta. Tamanna erseqqissarniarlugu saqqummiussinini nalunaaarusiaq takutitassiaraara, Nukákuluk Kreutzmann oqarpoq.
Taanna aperaarput sunarpiaq pissutigalugu taamatut tikisitsisarsimanersugut eqqoriarsinnaanera, imalu akivoq:
- Nalulluinnaqaara sooq taamatut tikisitsoqartarnersoq, taamaattumiguna qamani oqallittoqarnerani isornartorsiuisunga. Atornerlunneqarsimasut pillugit ilisimasaqarfimmik pilersitsinissarput nalornissutigigipput aamma isornartorsiuivunga, Nukákuluk Kreutzmann akivoq.
Inatsisartut ilaqutariinnermut ataatsimiititaliaanni siulittaasoq oqallinnermilu peqataasoq Agathe Fontain aperaarput misilittagaareersut atorluarneqarsinnaaneri Namminersornerullutik Oqartussanit pikkorluffigineqaqinersut, imalu akivoq:
- Aap, ataqatigiissaarinngippallaarsimavugut. Suna peqqutigalugu taamaassimanerluta akiuminaatsippara. Isornartorsiuineq taanna assut eqqarsariaallatitsivoq, Agathe Fontain akivoq.
Taanna apereqqipparput politikerit tamatumunnga qanoriliorsinnaanersut, ima akivoq:
- Namminersornerullutik Oqartussat kommunillu akisussaaffimmik tiguserusuppasigatik imminnut pisuuteqattaarlutillusooq ittarput. Siunissami suliaq uteqattaartinnagu paasinnittoqariaannartoq oqarsinnaasariaqarpugut uku taanna akisussaaffigalugu suliarissavaat, Inatsisartut ilaqutariinnermut ataatsimiititaliaanni siulittaasoq taama naggasiivoq.
