'Kanngusunniaritsi'

Atuagassiap aaqqissuisuata, Katherine Sandifordip, Canadap kujasinnerusuani innuttat naggueqatitsinnut Inunnut avannaamiunut paasisimasaat qanoq annertutiginersut paasiniarusulersimavaa. Apeqqutit allat 36-t aamma apeqqutigineqarlutik.

Paasisallu tupaallannaqaat. Atuagassiami aaqqissuisoq Canadian Pressimut oqarpoq, akissutit ilarpassui kukkusumik akineqartartut, ilaali aamma illarnartutut oqaatigalugit. Paasiniaanermi paasinarsivoq Canadap kujataamiuisa avannaamiortatik ilisimasaqarfigivallaanngikkaat.

Assersuutitut taavaa, Canadap kujataani najugallit 70 procentiisa naggueqatitta Inuit, illuikkani suli najugaqartuusut, aammalu amerlanersaasa oqaaseq Inuk qanoq isumaqarnersoq ilisimasimanngikkaat.

Trefjerdedelii isumaqarput upperilluinnarlugulu Canadap avannaa isarukitsut uumaffigigaat. Amerlasoorpassuillu isumaqarsimapput naggueqativut Inuit akileraarutinut akiliineq ajortut.

Aperineqartut amerlasoorpassuit aamma isumaqarput Canadap avannaani sakkutooqarfiit angisoorsuit arlallit pigineqartut, aammalu taakku eskimuunik aammalu Sullualummik paarsisuusut.

Paasiniaanerit inerneri atuagassiami qaammat una saqqummiunneqarput, saqqaani assitaritinneqarlutik isarukitsut, oqaasertalerneqarsimallunilu ima: Kanngusunniaritsi.