Naggataarnersiortut: Kanngunarsaarisoqarnera politiit ilungersunarluinnartutut isigaat
Politiini piareersimasuutitat pisortaata Malik Olesenip pisoq nalinginnaasuunngitsuunerarpaa, pingasunngornerullu ullaavani nalunaarutigineqartoq qaqutigoortupilussuusoq oqaatigalugu.
Niviarsiaraq 14-inik ukiulik sukamut qilersoriarlugu kivilerneqarsimavoq, taamaaliortoqarneralu atuartunit arlalinnit filmiliarineqarsimalluni.
- Suliat taama ittut nalinginnaasuunngillat. Suliassanngortinneqarnera ilungersunarluinnartutut isigaarput, politeeq taama oqarpoq.
Pisumik assilisanik videolianilluunniit siammarterisut meeqqanik kanngunartulianik siammarterisutut unnerluutigineqarsinnaanerat politiit aamma erseqqissaatigaat.
- Angajoqqaat atuarfillu qinnuigissavagut pisumik assilisanik videolianilluunniit siammarterisoqannginnissaa qulakkeeqqullugu, Malik Olesen taama oqarpoq.
- Assinik inuit attaveqaqatigiittarfiisigut tusagassiuutitigulluunniit elektroniskiusutigut siammarterisoqaraluarpat, tamanna meeqqanik kanngunartuliorneq pillugu inatsimmik unioqqutitsinerussaaq.
Nuummi politiit pingasunngornermi ullaakkut nalunaaqutaq qulingiluanngulersoq suliassanngortitsineq tiguaat. Inuillu arlallit suliami pasineqartut ullup ingerlanerani oqaloqatiginiarpaat.
- Atinik pissarsivugut, taakkulu misissuiffigissavagut. Taamaammat oqartoqarsinnaavoq pasisaqartugut sukumiinerusumik misissuiffigisassatsinnik, politiini piareersimasuutitat pisortaat, Malik Olesen, taama oqarpoq.
