Immikkut ilinniagallit: Kanngunarsaaneq kingunerlutsitsisinnaasoq
Atuartoq Ukaliusap atuarfiani sukamut pingasunngormat qilersorneqariarluni kivilerneqarpoq.
- Taanna annertoorujussuarmik sakkortuumillu killissamik qaangiineruvoq. Kannguttaatsuliorneruvoq sakkortooq, atoqatigiinnermut tunngasunik immikkut ilinniagalik, Ulrikka Holm, oqarpoq.
Aamma tarnip pissusaanik ilisimasalik Jonna Ketwa killissamik qaangeerujussuartoqartoq isumaqarpoq.
- Pimmatiginninneq ilungersunartorujussuaq matumani pineqarpoq. Atuartut atuartoqatiminnut marlunnut kanngunarsaarinissamik aalajangertut killeqanngitsumik pissusilersorput, Jonna Ketwa KNR-imut allappoq.
Taanna aamma allappoq, pimmatiginninneq eqqugaasunut kingunerlutsitserujussuarsinnaasoq.
Naleqannginnerusutut imminnut isigilertoqarsinnaavoq, matoqqasunngortoqarsinnaavoq, isumatsalertoqarsinnaavoq, nererusussuseeruttoqarsinnaallunilu.
Inuit allat ersigilersinnaagaat
- Pimmatigineqarsimasut atuariartoqqikkusukkunnaarsinnaapput, inuillu allat ersigilersinnaallugit. Pimmatigineqarsimasut ilaat pimmatigineqarusunnatik namminneerlutik pimmatiginninnissaminnik ilaanni aalajangertarput, Jonna Ketwa allappoq.
Aamma Ulrikka Holmip pimmatiginninneq tarnikkut innarliisartoq oqaatigaa.
- Kamammik peqalertarput. Immikkut aamma misigissutsikkut kanngusunneq pigisarpaat. Imminnullu aamma pisuutittoqarsinnaasarpoq, taanna aamma imminut naqissusiisarneq aamma sakkortuumik atulersinnaavaat)
Nunatsinni kannguttaatsuliornerit ajornartorsiutaasut, pisorlu ajornartorsiutip annertunerujussuanut takussutissaasoq, Holm isumaqarpoq.
- Una ersersiinnarpaa, nunatsinni kannguttaatsuliorneq qanoq ajornartorsiutigineripput. Allaat atuarfeqarfinni pisinnaasarsimalluni. Tamaattumik nunatsinni kannguttaatsuliorfigitittunut katsorsaaviliortoqarnissaa, taanna siullertut takorloorpara nunatsinni inuiaqatigiinnut pitsaanerpaajussasoq.
Atoqatigiinnermut tunngasunik immikkut ilinniagalik, Ulrikka Holm taama oqarpoq.