Kangillinnguit Atuarfianni atuartut oqaluttuarisaaneq pillugu unammisitsinermi ajugaasut
Nuup ilaani Nuussuarmi Kangilinnguit Atuarfianni atuartut oqaluttuarisaaneq pillugu ilinniartilluarneqartarsimagunavipput.
Kangillinnguit Atuarfiannimi 7. B-mi atuartut Historiedystenip Nunarput pillugu immikkoortuani ajugaasuupput Danmarkimilu Frederiksborg Slottimi Det Nationalhistoriske Museumimut paasisassarsiorlutik angalasussanngorlutik.
Unammisitsinermi sammineqartoq tassaavoq ”Grønland og den danske forbindelse” (Kalaallit Nunaat Danmarkimullu atassuteqarnera, aaqq.), Kangillinnguit Atuarfiannilu 7. B-mi atuartut sammisaminnut paasisimasaqarluarput tunniussaallu suliarilluagaalluni, Frederiksborg Slotimi Det Nationalhistoriske Museumimi pisortaq Mette Skougaard taama oqarpoq.
Aamma atuaruk Oqaluttuarisaaneq pillugu unammisitsinermut 5.-10.-klassit peqataasinnaasut
Ajugaassutigisaat tassaavoq Pôq aamma Qiperoq 1700-kkunni Københavnimukartut pillugit oqaluttuarisaaneq pillugu filmiliaat. Taannalu suliarilluagaallunilu oqaluttuarisaanermut tunngatillugu eqqortumik suliarineqarsimavoq.
Nuuk Internationale Friskolemi 6. klassit normu 2-nngorput, Nuummilu Atuarfik Hans Lyngemi 9. A-mi atuartut normu 3-nngorlutik.
Tamatuma saniatigut Niaqornaarsummi Atuarfik Kristian Lundbladimi atuartut aamma Kitsissuarsunni Ole Reimerip Atuarfiani atuartut immikkut akissarsitinneqarput nunaqarfimmioqatiminnik tamanik peqataatitsisimanertik pillugu.
Atuaqatigiiaat suliaminnut kusanartumut qujassutitut katersugaasivimmit tunissutissanik pissanganartunik nassiussarsinissartik siunissami qaninnermi naatsorsuutigissavaat.
