Kangilinnguit siunissaat eqqartorpaat

Naalakkersuisut Illersornissamullu ministerip Kangilinnguit siunissaat eqqartorsimavaat. Qularutissaanngitsumillu Kangilinnguani sakkutooqarfiup timmisartuussiffiusarnissaanut aaqqiissutissanik isumaqatigiittoqarpoq.

Sakkutooqarfiup Kangilinnguaniiginnarnissaa, kiisalu umiarsuit alapernaarsuutit timmisartuussiffigineqartarnissaat aamma qulakkeerneqarpoq. Siunissami inuit assartorneqartarnissaannut aningaasartuutaajumaartussat naalakkersuisut, Ivittuut Kommune kiisalu Danmarkimit avitseqatigiinnikkut akilerneqartassapput. Aningaasanut nunanullu allanut naalakkersuisoq; Josef Motzfeldt, Sermitsiap nittartagaanut taama paasissutissiivoq. Illersornissamut ministeri; Søren Gade-p sapaatip akunnerani kingullermi ataatsimeeqatigereernerata kingorna.

Josef Motzfeldt-ip illersornissamullu ministerip ataatsimeeqatigiinnerat pivoq, illersornissamut sakkutooqarfiup suleqatigiissitaliaata sakkutooqarfiup matuneqarnissaa siunnersuutigereeraalu, naalakkersuisut angallannikkut allannguiniarnermik siunnersuuteqareernerata kingorna.

Kangilinnguanut timmisartuussisarnissap annikillisinneqarnissaanik naalakkersuisut siunnersuuteqarsimapput, tamannalu akerlerineqarsimaqaaq. Timmisartuussisarneq Illersornissamut ministereqarfiup 2007-p naanissaata tungaanut tapiissuteqarneratigut nangeqqinneqarpoq.

Illersornissamut ministereqarfimmiit ataatsimeeqatigiissimaneq oqaaseqarfigiumaneqarsimanngilaq, inaarutaasumik inerniliisoqarsimanngimmat. Kangilinnguani sakkutooqarfiup siunissaa pillugu eqqarsaatersuutit suli naammassinngillat, illersornissamut ministereqarfiup tusagassiisarnermut immikkoortortaqarfia paasissutissiivoq.