Kangilinnguit qanoq pineqarnissaat innuttaasut sunniuteqaqataaffigissavaat

Kommunip tungaanit annertuumik suliniuteqartoqarneratigut, innuttaasut Kangilinnguit siunissami qanoq atorneqarsinnaanerinut siunnersuuteqarsinnaanerat Illersornissamut ministeriaqarfiup akuerisimavaa. Tamanna apriilip aallaqqaataata tungaanut innuttaasunik tusarniaanikkut pissaaq, kingornalu Kangilinnguit siunissaat pillugu pilersaarutit ingerlateqqinneqassallutik.

- Kangilinnguit atorunnaarsiakkiartuaarneqarneranni ammasumik pissuseqarnissaq pillugu noqqaassuterput Illersornissamut ministereqarfimmiut tusaaniarsimammassuk nuannaarutigaara. Siusinnerusukkut innuttaasut peqataatinneqarnissaat pillugu Illersornissamut ministereqarfimmiut qinnuigisimavakka. Kangilinnguit atorunnaarsikkiartuaarneqarneranni Kommuneqarfik Sermersooq timitaliilluni peqataasimavoq aamma tamanut tusarniaanikkut atorunnaarsitsiartuaarnermi tamarmi ammasumik pisoqarnissaa pillugu nukippassuit atorsimavavut. Tamannalu Illersornissamut ministereqarfimmiut malissimavaat, borgmester Asii Chemnitz Narup oqarpoq.

Sakkutooqarfiusimasup siunissami qanoq atorneqarnissaanut siunnersuutissaqaraanni Forsvarets Bygnings- og Etablissementstjenestemut saaffiginnittoqarsinnaavoq. Kisianni illuuterpassuit tiguniaraanni aningaasarpassuaateqartoqartariaqartoq oqaatigineqassaaq, tassami sumiiffiup ingerlanneqarnissaannaa 20 mio. koruuninik akeqarpoq. Aamma avatangiisit pillugit pisussaaffiit piginnittunut nutaanut tunniunneqarnerisigut pituttuisuusumik pisussaaffeqartoqalissaaq.

Uani paasisarnerusinnaavutit: Ingerlaqqiffissaq: http://forsvaret.dk/FBE/EJENDOMSSALG/GRØNNEDAL/Pages/default.aspx