Kangilinnguit matuissussanngillat
Issittumi sakkutooqarfik Nuummi pilersinneqassaaq 2012-ip naalernerani. Taanna Savalimmiuni Torshavnimi mikinerusumik immikkoortoqarfeqassaaq.
Siornali aalajangiunneqarpoq Kangilinnguani sakkutooqarfik Issittumi sakkutooqarfimmik taarserneqassasoq. Taamanili pilersaarutaajuarsimavoq Kangilinnguit amerikamiunit 1947-mi sakkutooqarfiliarineqartut matuneqassasut. Kisianniligooq matuissussanngillat.
- Kangilinnguani antenneqarfiuteqarpugut taannalu suli ingerlaannassaaq, Kangilinnguani sakkutooqarfimmi ingerlatsinermi qullersaq Michael Hjorth KNR-mut oqarpoq.
Taassuma ilanngullugu oqaatigaa antennet Nuummiit aqunneqarumaartut taamaattorli innaallagissiorfik suli pisariaqartinneqarumaartoq. Taamaammat inuit amerlanngikkaluit suli Kangilinnguani sakkutooqarfimmi sulissapput.
- Pilersaarutaavoq ukiut arlaqanngitsut qaangiuppata Nuummi antenneqarfimmik nutaamik sanasoqarnissaa. Kisianni taassuma piareernissaata tungaanut Kangilinnguani antenneqarfik pisariaqartinneqassaaq, Michael Hjorth oqarpoq.