Kangilinnguanut timmisartuussisarneq naliliivigineqaqqissaaq
Kangilinnguani sakkutooqarfiup Air Greenlandimit timmisartuussivigineqarunnaarnera aaqqiiviginiarlugu ataasinngorpat Namminersornerullutik Oqartussat Air Greenlandilu ataatsimeeqatigiissapput.
Ineqarnermut Angallannermullu Naalakkersuisoq Jørgen Wæver Johansen oqarpoq Air Greenlandiminngaanniit akigitinneqartut ataatsimiinnermi naliliiffigineqassasut:
- Air Greenland-iminngaanniit akigitinneqartut naliliivigineqaqqinnissat natsorsuutigaara, aamma naalakkersuisuninngaanniit aalajangernikuuvugut Inatsisartut ukiuunerani ataatsimiinnissaanut naleqqussaanissamut aningaasanik qinnuteqarniarluta, Jørgen Wæver Johansen oqarpoq.
Jørgen Wæver Johansen erseqqissaavoq Kangilinnguarmiut allatuulli angallannikkut aaqqivigineqartut.
Kangilinnguit timmisartuussivigineqarunnaarnerat Danmarkimi aamma oqallisaalerpoq.
Dansk Folkepartiini illersornissamut tunngasunik oqaaseqartartup, Hans Kristian Skibby-p pisoq tissinanngingaarami tissinartutut nalilerpaa, illersornissamullu ministerimut Søren Gade - mut pisoq ingerlateqqinniarlugu oqarluni.
Kangilinnguani najugaqartut inuit 160-iusut ukiortaamiit sapaatip akunneranut marloriarlutik timmisartukkut aqqusaarneqartarnerat unitsinneqarmalli, KNI-ip pajuttaataanik Qaqortoq aqqusaarlugu piffassaq annertooq atorlugu Kangilinnguaniit Danmarkiliartalerput.
Ukiumut Kangilinnguaniit Danmarkimut angalasartut inuit 550-iusut ulloq ataaseq atorlugu angalasarnerigaluat maanna ullut arfinillit atorlugit Kangilinnguaniit Qaqortoq aqqusaaqqaarlugu Narsarsuarmiit Danmarkiliartoqartarpoq.
Kangilinnguani sakkutooqarfimmi orlogskaptajn Alex Jensen-ip Namminersornerullutik Oqartussat Kangillinnguanut angallassisarnerup suliarisimaneranut ima oqarpoq:
- Tupaallaatigeqaarput maani helikopterimik angallannerup taamaatinneqarnerata uagutsinnulluunniit ilisimatitsissutigineqannginnera.
Arlaleriarluta Namminersornerullutik Oqartussanut timmisartuussisarnerup aallarteqqinneqarnissaa noqqaassutigisaraluarparput – Paamiunullu helikopterimik angallassisarnerup ingerlaannarnerani uagut qulaatiinnarluta timmisoqartalissaaq – tamannalu paasiuminaalluinnarpoq, Alex Jensen oqarpoq.