Kangilinnguani umimmat illoqarfimmi angalaartarput
Umimmaat neriniarlutik takkuttarput eqqaminnilu angallattoqarnera akornutigivallaassanagu. Inuit bilillu eqqaminnut pigaluaraangata qimaaneq ajorlutik.
Taamaattumik Kangilinnguarmiut aninialeraangamik aqqutissartik alaatsinaaqqissaartarpaat. Aqqutissaminnilu umimmaqarpat tamanna sakkutooqarfiup radiuatigut mianersoqqusissutigineqartarpoq. Tassami umimmaat arlaleriarlutik inunnut qanillivallaartunut malersuisarmata.
1987-imi umimmaat 15-it Kangerlussuarmiit Ivittuut kommuniannut nuunneqarput. Amerliartornissamut periarfissarissaaqimmat piniarnermik nakkutilliisup oqaatigaa massakkut umimmaat 700-t missilorlugit amerlassuseqalersimasut.