Kangilinnguani sakkutuut imarsiortut suliami ilai Pituffimmut nuukkusuppaat
Sakkutuut imarsiortut qullersaqarfianni pisortap, kontreadmiral Nils Wangip, siunnersuutigaa, umiarsuit danskit alapernaarsuutaasa timmisartuisalu annaassiniarnissamut avatangiisinillu alapernaarsuinissamut Pituffiup atorsinnaanissaanut amerikamiut illersornissamut immikkoortortaqarfiat Sakkutuut imarsiortut Sakkutuullu Timmisartoqarfiisa isumaqatigiissuteqarfigissagat, Pituffik tassaassalluni taakkununnga pilersuiffik avannarpasinneq. Aviisimi Berlingske Tidendemi taama allaaserinnittoqarpoq.
Qalasersuarmi Sullualuk, allaanngitsumillu Kangianut aqqut, Asia, Amerikap Kangisissua Europallu Kippasissua akulloqqullugit umiarsuit niuffagiaatit angalasalersinnaanissaat ungasinngitsukkut pissagunarpoq.
Nunat issittut, Danmarkip, Canadap, Norgep aamma Ruslandip issittumi isumalluutit pineqartillugit nunarsuaq tamakkerlugu maleruagassat malinneqartarnissaat pillugu Ilulissani upernaaq isumaqatigiissusiornerat Nils Wangip tikkuarpaa. Imaani annaassiniarneq, avatangiisinik illersuineq umiartortullu isumannaatsuunissaat suleqatigiissutigissallugu nunat taakku aamma isumaqatigiissutigaat.
