Kangilinnguani sakkutooqarfiup Nuummut nuunneqarnissaa piumasarineqalerpoq

Silaannaap kiatsikkiartornera, aatsitassarsiornerit, takornariaqarnerulernerlu ilutigalugit naatsorsuutigineqarpoq Nunatta sineriaa umiarsuarnik angallaffiunerulernissaata annertusinissaa. Tamakku tamarmik sillimaniarnermut annertusaassasut, nalunaarusiornermi allaaserinnittoq Jon Rahbek-Clemmensen, oqarpoq, Kangilinnguanilu sakkutooqarnermut qullersaqarfiup Nuummut nuunneqarnissaa inassutigalugu.

- Ilimagineqaraluartutut Issittumi sakkutooqarfinnik amerlisaanissaq tunngavissaaruppoq. Taarsiullugu suliassaalissaaq sakkutuujunngitsunik nakkutilliinissaq, annaassiniartarnissaq, avatangiisinillu mingutsaaliuinissaq.

Inuiaqatigiit kalaallit ineriartupiloorneranni imaatigut angallannerit annertusissapput.

Sinerissap qanittuani annaassiniartarnerit politiit ullumikkut isumagisaraat, avasissumilu annaassiniartarnerit, nakkutilliinerillu Kangilinnguaniit isumagineqartarlutik.

- Siunissami ataqatigiissaariniarneq ajornakusuulissaaq. Sakkutooqarfik Kangilinnguaniippoq politiillu qullersaqarfiat Nuummiilluni. Siunnersuutigaarput Kangilinnguit Nuummut nuunnerisigut annaassiniartarnerit Nuummi ataatsimut qullersaqarfeqalernissaat. Taamaalilluni annaassiniartartut, politiit sakkutuullu siunissami suliaasa annertusiartorneri ilutigalugit ataatsimoorlutik qullersaqarfeqalissagaluaramik.

Naatsorsorneqarpoq Kangilinnguani sakkutuut qullersaqarfiata Nuummut nuunnera 200 million koruuneqassasoq. Nuussinermili illuatungaagut ukiumut 30 million koruuninik sipaaruteqartoqartassasoq, Jon Rahbek-Clemmensen naggasiivoq.