Kangilinnguani Sakkutooqarfiup Narsarsuarmut nuunneqarnissaanik siunnersuut naapertuutinngilaq

-Nuummut nuukkusunnitsinnut pissutigaarput suleqatiginerpaasatta, tassalu Namminersornerullutik Oqartussat, Politiit qullersaqarfiat Rigsombudsmandeqarfiullu qanimut suleqatigisinnaalernissaat, Narsarsuarmullu nuukkaluarutta qanillinaviangilagut, Alex Jensen oqarpoq. Illersornissamut ministereqarfiup maannakkorpiaq Kangilinnguani Sakkutooqarfiup Savalimmiunilu Sakkutooqarfiup Århusimi Sakkutuut Imarsiortut Qullersaqarfiannut nuunneqarsinnaanerat misissorpaat. Misissuinerit aallartipput angallannerup nutarterneqarnerata kingorna Kangilinnguit qulimiguulimmik tikinneqassaarmat, maannali qulimiguullip Kangilinnguanukaqqittalerneranut aningaasartuutit Kalaallit Nunaata Illersornissamullu ministereqarfiup akilertalerpaat, taamaalilluni Kangilinnguit sakkutooqarfittut atorneqaannarsinnaanera orniginartinneqaleqqippoq. Illersornissamut ministereqarfiup periarfissanik misissuereeruni nalunaarfigiumaarpaatigut, Kangilinnguaniittuusugulli soorunami maaniiginnarusunnerugaluarpugut. Sakkutooqarfiup Narsarsuarmut nuunniarneqarneranut pissutaasinnaasutuatut eqqaasinnaasarput, tassa kommunit kattussuuppata Kujataata kommunerujussuanngoruni akileraarutitigut isertitaqarnerusarnissaa, Alex Jensen Kangilinnguaniit oqarpoq.