Kangilinnguani sakkutooqarfik matuneqartussanngorpoq

Kangilinnguani sakkutooqarfik oqaluttuaannanngulerpoq. Danskit naalakkersuisuisa illuatungiliuttut partiivinik tallimanik isumaqateqarlutik illersornissaq pillugu ukiuni tulliuttuni sisamani isumaqatigiissusiaanni aalajangerneqarpoq, Kangilinnguani sakkutooqarfik Savalimmiunilu sakkutooqarfik ataatsimoortinneqalissasut.
Allattoq Jaaku Lyberth
juunip 29-at 2009 05:24

Nunatta Savalimmiullu sakkutoqarfissaat Nunatsinniissanersoq qulakkeerneqanngilaq.

- Kalaallit Nunaanni Savalimmiunilu illersornissaqarfiit ataatsimoortinneqalissapput, sakkutuut issittumi ataatsimoorlutik naalagaqalissallutik. Sakkutuut qullersaqarfiat sumiikkuni pitsaanerpaassanersoq misissorneqassaaq, illersornissamut isunaqatigiissummi, 2010-miit 2014 ilanngullugu atuuttussami allassimavoq.

Isumaqatigiissutip pappialartaa naapertorlugu ilimanarsivoq, aningaasanik sipaaruteqarnissaq Nunatta Savalimmiulu illersornissaqarfiisa katitinnissaannut tunngaviusoq. - Atlantikup avannaani sakkutooqarnikkut aaqqissuussaanerup naammassinnissinnaasusia annertusarneqassaaq, taamaalilluni Kalaallit Nunaanni Savalimmiunilu ineriartornermut naleqquttunngortillugu,. Taama isumaqatigiissummi allassimasoqarpoq.

Danskit sakkutooqarneq pillugu ilisimatusarfiata qaammat ataaseq qaangiuttoq inassutigaa, Kangilinnguani sakkutooqarfik Nuummut nunneqassasoq, immakkut angallanneq pissutigalugu.

Kalaallit Nunaanni illersornissaqarfiup Kangilinnguaniittup atorunnaarsinnerata saniatigut, Folketingimi illersornissamik isumaqatigiissutip aamma kingunerissuvaa, Pituffimmi sakkutooqarfiup danskit sakkutooqarneranni annerusumik atorneqalissammat, minnerunngitsumillu danskit sakkutuunik issittumi aallartinneqartartussanik pilersitsissammata.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq