Kangilinnguani sakkutooqarfik isumaginnilluarnerulissaaq
Imaani angallattunik annaassiniarnerit, ujaasinerit, immami avatangiisinik allanngutsaaliuineq peqqarniisaarnianullu akiuiniarneq, tamakkuupput Kangilinnguani sakkutooqarfiup nutaamik nunarsuarmi sumiluunniit atorneqarsinnaasumik alapernaarsuinermi atortorissaarutitaaruni pitsaanerusumik isumagisinnaaligassai.
Allattoq Elisa Isaksen
juulip 12-at 2009 16:54
Aaqqissuussineq nutaaq qarasaasiakkut ingerlanneqassaaq, sinerissamillu nakkutilliisunut nunarsuarmi sumiikkaluartunulluunniit nutaamik periarfissiilluni, taaguuteqarlunilu LRIT.
Taanna tuluttuumit naalisagaavoq, Naalagaaffinnilu Peqatigiinni imarsiornermik ingerlatsivimmi aalajangiisoqareerneratigut nunarsuarmi tamarmi umiarsuakkut angallanneq tamaat malinnaaffigalugulu nakkutigissallugu.
LRIT-mik aaqqissuussinermik atuilernikkut Kangilinnguani Sakkutooqarfiup juulip aallaqqaataaniit, Nunatta imartaani umiarsuartigut angallanneq tamaat malinnaaffigisinnaanngorpaa. Tamanna imaatigut annaassiniartoqartariaqalersillugu pingaaruteqarluinnalersinnaavoq.
