Kangilinnguani sakkutooqarfik imaani annaassiniarnersuarmik sungiusarniarpoq
Takornariartaassuarmik Costa Concordiatut ittumik sungiusarnerup nalaani Tunup avannaani umiusuusaartitsinissaq aallaavigineqassaaq.
- Costa Concordiap umiuneratut ittumik Tunup avannaarsuani umiusoqartuusaartillugu sungiusaqatigiinnissarput aallaaveqassaaq, annaassiniarnermilu suut ajornartorsiutigineqassanersut tassani paasiniarneqassallutik. Umiarsuarni sorsuutini naalagaq, Kangilinnguanilu alapernaarsuinermut ingerlatsivimmi qullersaq, Michael Hjorth oqarpoq.
- Sungiusarnitsinni umiarsuaq ujaarineqaqqaartussaassaaq, ujaariniakkattami maleruagassat naapertorlugit, sumiinnertik nalunaaquttap akunneri arfinilikkaarlugit uagutsinnut nalunaarutiginnittussaallutik nalunaanngitsoorsimappata, ujaasinerput aallartinneqartussaammat.
Taava umiarsuaq Illoqqortoormiut avannaatungaani kangerlummi Kong Oscar Fjordimi ikkarlissimasoq nassaarissavarput ilaasuilu annanniutinut issoralereersimasut naammattuussallutigik, taava annaassiniarneq tassanngaanniit aallartissavarput, Michael Hjorth oqarpoq.
Nunat issittumiittut nunanut allanut tunngasunut ministeri Nuummi siorna maajimi ataatsimeersuarnerisa nalaanni issittumi ujaaseqatigiittarnissamik annaassiniaqatigiittarnissamillu isumaqatigiissutaat Kangilinnguani sakkutooqarfiup maanna sungiusaqatigiinnermikkut timitalerniarnialerpaat.
- Aatsaat taama annertutigisumik sungiusaqataanialerpugut, taamaaliornissarpullu tusagassiuutinik politikerinillu arajutsineqarumanngeqimmat suliassarput imaannaassanngilaq, Michael Hjorth oqarpoq.
Politikerillumi arajutsiumasaqannginnerat qallunaat illersornissamut ministeriata Nick Hækkerupip akuuniarluni pilersaarutaanerata naqissusiinnarpaa.
Nunalli issittumiittut sungiusaqatigiinnissamut qanoq akuutiginiarnersut suli iluamik ilisimaneqanngilaq, qaammatilli massuma naalernerani Københavnimi ataatsimeersuarunik tamanna sukumiinerusumik paasinarsissasoq oqaatigineqarpoq.
Ulluni tallimani - tassa septembarip qulinganiit 14-iata tungaanut, annaassiniarnermut sungiusaqatigiittoqassaaq.
