Kangilinnguani sakkutooqarfik aamma Savalimmiuni sakkutooqarfik ataatsimoorteqquaat
Danmarkimi partit illersornissamut isumaqatigiissutaat ukiormanna naasussaavoq, taamaattumik illersornissamut ataatsimiititaliap isumaqatigiissutissamut 2010-mit atuutilersussamut suliaqarnermi tunngavigineqarsinnaasoq, ippassaq saqqummiuppaa.
Kangilinnguani sakkutooqarfiup aamma Savalimmiuni sakkutooqarfiup kattunneqarsinnaanerat siunnersuutinut ilaavoq. Kangilinnguani sakkutooqarfiup pisortaa Jan Bøgsted oqarpoq, ataatsimut taamatut kattunnissaq pitsaaquteqarlunilu pitsaanngequteqartoq.
- Ataatsimoorussamik sakkutooqarfiliornikkut sipaartoqarsinnaaneranik periarfissaqarpoq, sakkutooqarfiillu taakku marluusut imartaqatigiimmata siunnerfik ajorpasinngilaq. Taamaattorli ataatsimoorussamik sakkutooqarfiup Kalaallit Nunaanniinnissaa siunnersuutaammat, Savalimmiormiut tapersersuinissaat ilimananngilaq, Kangilinnguani sakkutooqarfiup pisortaa oqarpoq. Ilanngullugulu oqaatigalugu taamaaliornikkut Savalimmiormiut sakkutooqarnikkut ilisimasaat annaaneqarsinnaasut.
Illersornissamut ataatsimiititaliap nalunaarusiaa politikerinit oqallisigineqassaaq, taamaalilluni illersornissamut isumaqatigiissutissaq 2010-mit atuutilersussaq ilusilersorneqarsinnaaniassammat.
