Kangilinnguani eqqaanilu najugallit qulimiguulimmik angalasinnaleqqipput

Kangilinnguani eqqaanilu najugallit angalanialerunik kingumut qulimiguulimmik angalasinnaalerput; angallanneq pillugu aaqqissuussineq nutaaq atulermalli periarfissaq atorunnaarsinneqaraluarpoq.

Naalakkersuisunut ilaasortap Jørgen Wæver Johansenip ullumi danskit illersornissamut ministeria Søren Gade ataatsimeeqateqatigigamiuk isumaqatigiissutigaat aningaasartuutit 1 millioni koruuniusut aveqatigiittalerniarlugit.

-Kangilinnguanit avannamut kujammullu sapaatip akunneranut ataasiarluni Air Greenland angallassisinnaalerneranut periarfissiivoq, Jørgen Wæver Johansen angusamik tulluusimaarutiginneqisoq unnersiorpoq.

Kangilinnguanilumi sakkutuut pisortaata Ole Sparrevohnip isumaqatigiissutigineqartoq naammagisimaarpaa, inuinnaammi angallannerini pisariaqartitat taamaalillutik allanut atorsinnaaleramikkit.

Angallanneq pillugu aaqqissuussineq nutaaq atulermalli nunatsinni angallannerni iluarsisassat suli arlaqarput. Assersuutigalugulu Qeqertarsuup tunuani, unammersuartoqassatillugulu angallannerni. Jørgen Wæver Johansen radioaviisimut oqarpoq ataatsimoorussamik aaqqiisoqarnissaanik sulissuteqarniarluni, neriuutigaalu poorskertinnagu kinguninngualuunniit tamanna piumaartoq.