Ruslandimi naalagaaffiit ilaanni Murmanskimi guvernøri, Dmitry Dmitriyenko, taama eqqoriaavoq.
Nioqqutissat 2 millionit tonsit Sibiriap sineriaata avannarpasissuatigut ukioq-manna assartorneqarput, guvernørilli takorloorpaa nioqqutissat 19 millionit tonsit missaat ukioq 2020-mi assartorneqartalerumaartut.
Taamaattoqartalernissaa Murmanskip aningaasaqarniarneranut annertuumik kingunerlutsitsissaaq. Nioqqutissammi assartorneqartartut maanna affaat sinnerlugit, tassa 60 procentit, Murmanskimi umiarsualivimmiit assartorneqartarmata.
Kangianut Aqqutip kangiatungaa qaammatini tallimani ukioq-manna aqqutigineqarsinnaasimavoq, tassa qaammammik ataatsimik siusinnerusumik sikuerami. Kitaatungaanili aqqut qaammatini arfineq-marlunni ingerlavigineqarsinnaasimalluni. Aviisimi The Barents Observerimi tamanna allaaserineqarpoq.
Ruslandimi oqartussaasut oqarnerat naapertorlugu Kangianut Aqqutaatigoortarneq Europamiit Suezip ikerasaatigoorluni, Indiap kujasissuatigoorluni, Japaniliarnermit tallimariaammik/-arfinileriaammilluunniit ullumikkut akisuneruvoq - sivikinnerujussuullunili.