Kangiani qiterlermiut: -Danskit sussaanngillat!
Danskit sussaanngillat – Skandinaviamiut ajunngillat. Nalunaarusiaq nunanut allanut ministeeriaqarfimmeersoq nutaaq naatsumik taama oqaatigineqarsinnaavoq, nalunaarusiami pineqarpoq Danmarkip Skandinaviallu Kangiani Qiterlermi isigineqarnerat.
Muuamaat ilaarutigalugu titartakkat suli sunniusimapput Danmarkilu eqqugaanerpaavoq:
Soorlu Amerikamiut niuerneranni takuneqarsinnaasutut aamma danskit niuerneranni amerlanertigut takuneqarsinnaasutut pingaartinneqartariaqarput, pisiassap akia pitsaassusaalu, danskit suliffeqarfiattut nittarsaanneq pingaarnerunngilaq.
Taamaattumik nunanut allanut ministeeriaqarfimmit nalunaarusiami danskit nunanik Kangiani Qiterlermeersunik niueqateqaraangamik danskinit suliffeqarfiutigineqarnertik pingaartinnginnerussagaat oqaatigineqarpoq.
Tamanna Dansk Folkepartimi inuutissarsiornermut oqaaseqartartumit Colette Brix-imit iluarineqanngilluinnarpoq.
- Nunanik Kangianik Qiterlermeersunik niueqateqarutta aamma sooq danskiunerput pingaartinnginnerussavarput, uagummi ajoquteqanngilagut. Uagut politikeritut suliassatta pingaarnersaraat naqisimaneqarani oqaaseqarsinnaatitaanerup illersornissaa. Tamanna Nunani Qiterlermiunit qanoq isumaqarfigineqassanersoq danskit suliffeqarfiisa suliassarinngilaat, Colette Brix oqarpoq.
Suliffeqarfik Muuamaamik titartakkanit eqqugaanerpaasoq tassaavoq, immummit tunisassianik tunisassiorfissuaq Arla.
Kisitsisit kingulliit takutippaat Arlap Kangiani Qiterlermi tunisartakkani uterfigeqqilersimagai.
Finn Hansenip Arlameersup danskiuneq Skandinaviamiuunerluunniit pingaarnertut isiginngilai.
- Misilittakkavut naapertorlugit tunisassiatsinni tunngavigaavut nunarsuaq tamakkerlugu tuniniakkavut. Tunisassiattalu pitsaassusaat pingaartinneruavut nunamit suminngaanneersuunerput pingaarnerutinnagu, danskiunerput isertuutinngilarput aammali qaqqaqqalaarutiginngilarput, Finn Hansen oqarpoq.
Avammut tunisat kingulliit takutippaat februaarip aallaqqaataaniit septembarip aallaqqaataata tungaanut danskit Kangiani Qiterlermi tunisaat 18 procentimik appariarsimasut – taakkua 1,6 milliard koruuninik naleqarput.
