Kangiani qiterlermi pisut najummassimanarsiartuinnarput

Israelimiut timmisartunik qulimiguulinnillu sorsuutinik Libanonimut ulloq naallugu saassussisaqattaarput. Ikaartarfiit, aqquserngit umiarsualiviillu saassuttarpaat, hizbollah-millu peqqarniisarniartartunut tapersersuisut pingaartumik saassuttarlugit.

Hizbollah-kkut israelimi illoqarfiit anginerit pingajuat Haifa ullumi raketinik saassuppaat, saassussinermilu israelimiut inuinnaat arfineq pingasut toqutaapput.

Saassussineq israelimiut naalakkersuisuisa illoqarfissuarmi Tel Aviv-imi isumannaallisaaneq annertusitippaa. Naalakkersuisunit oqaatigineqarpoq saassussinermi rakettit atorneqartut Syriami sanaajusut.

Syriamiut siorasaarutigaat Israeli Syriamut saassussigaluarpat sakkortuumik akineqarumaartut.

Libanonimi allatut innuttaassusilinnut qimaatitsineq aallarteruttorpoq. Danskit nunanut allanut ministeriaqarfiata danskisut innuttaassusillit bussit, umiarsuit timmisartullu atorlugit Libanoniminngaanniit qimaatinniarpaat.