Kangiani Qiterlermi pisut avissaartuutilissutigivaat
Kangiani Qiterlermi pisut USA-mi kristumiut iivangkilistit akornanni avissaartuutilersitsipput.
Israelip naalaagaaffittut atajuaannarnissaa USA-mi kristumiut iivangkilistit oqariartuutigiuarsimasaat allanngortinneqarpoq, Israelillu saniatigut Palæstinamiut naalagaaffeqarsinnaanissaat tapersersoritsik iivangkilistit siuttuisa 34-t præsident George W. Bushimut allagaqaateqarnerminni takutippaat.
- Israelimik assuarinninngilagut, Israelillu isumannaatsumik atajuarnissaa kissaatigaarput, aaqqissuussinerli nutaaq patajaatsorlu ujartorparput. Isumaqatigiissuteqartoqartariaqartoq ilisimaaraarput, George W. Bushimut allagaqaateqartut ilaat Ronald Sider oqarpoq.
Allagaqaat musliminut tamanut nalunaarutaasoq Siderip aamma oqaatigaa.
- Pitsaasumik atorneqarsinnaalluartumillu aaqqiissuteqartoqarnissaa iivangkilistit USA-miittut kissaatigigaat, muslimit paasisariaqarpaat, Ronald Sider oqarpoq.
Ilagiit kristumiut iivangkilistit akornanni avissaartuunnerit piffissami kingullermi ingasatsikkaluttuinnarsimasut, aviisip The New York Timesip allaaseraa.
Silap pissusaata allanngoriartornera nunat tamat akornanni suleqatigiinnikkut akiorniarneqarnera iivangikilistit tapersersorpaat, peqqarniisaarnianillu akiuiniarnermi naalliutsitsisarnerup atorneqartannginnissaa iivangkilistit aamma tapersersorpaat.
